~~META:
title = Данута Бічэль-Загнетава — Любы мой!
&keywords = Данута, Бічэль, любы, мой
&abstract = Чытаць верш "Любы мой!" Дануты Бічэль-Загнетавай
&iftrue = nan
~~

====== Данута Бічэль-Загнетава — Любы мой! ======
Любы мой!\\
Сцяжынаю зямною\\
ходзіш —пругкі,\\
малады і ўпарты.\\
Будзь адкрытым,\\
праведным са мною,\\
з іншымі —\\
любові нашай вартым.\\
\\
Мне, як шчырай кнігаўцы на лузе,\\
без расінкі прагнуць і марнець.\\
Што ні ўчыніш на жыццёвым крузе,\\
кожны чын твой дойдзе да мяне.\\
\\
Вуснамі,\\
алоўкам,\\
чуткі стрэлам.\\
Сэрца\\
вымерае\\
меркай часу.\\
Дазваляю быць са мной нясмелым,\\
а з Радзімай смелым да адчаю.\\
\\
Можаш свята нашае не ўспомніць,\\
не прынесці ружаў ці вяргінь.\\
Толькі не праспі ты\\
ноч-апоўнач\\
крокі ворагаў і варагінь.\\
\\
За ракой, за борам, за гарою\\
пагасціць запросіць край суседскі, —\\
будзь заўжды маёй душы героем,\\
будзь сапраўдным,\\
як Максім Гарэцкі.

 


===== Падобныя старонкі =====
  * [[творы/эдуард-акулін/эдуард-акулін-трыялет]]
  * [[творы/янка-журба/янка-журба-каханне]]
  * [[творы/рыгор-крушына/рыгор-крушына-твае-вочы]]
  * [[творы/язэп-пушча/язэп-пушча-яшчэ-ў-юнацкія-гады]]
  * [[творы/анатоль-грачанікаў/анатоль-грачанікаў-свяці-кахання-чыстая-]]