~~META:
title = Данута Бічэль-Загнетава — Кросны
&keywords = сувой, сонца, толькі
&abstract = Чытаць верш Дануты Бічэль-Загнетавай "Кросны"
&iftrue = nan
~~

====== Данута Бічэль-Загнетава — Кросны ======
У раніцы, у леце, у прыродзе\\
сядзела на бярозавай калодзе.\\
Вакол ад кветак, ад росаў бела.\\
Шчэ толькі сэрца істоту грэла.\\
\\
Не варушыліся, драмалі цені\\
і людзі дасыпалі. Толькі пеўні\\
выводзілі свае чатыры ноты.\\
Нічога не азмрочвала пагоды\\
маёй натуры... Праўда, нейкі птах\\
гартанна прадвяшчаў абстрактны страх.\\
Прарэзаў неба, растварыўся ў соснах.\\
Снавала промні па тумановых кроснах\\
спрадвечная зямная ткалля –\\
сонца,\\
матаючы вясёлкавы сувой\\
на круглы шар зямны, як на навой,\\
маўкліва, засяроджана, бясконца.\\
\\
Разгладжваю сівы сувой далонькай:\\
не скамячыць бы ў вечнасці далёкай,\\
каб ён нашчадкам не быў каляны.\\
Пакуль у вочы сонцу можна глянуць –\\
накласці на аснову свой уток –\\
сцяжыну палявую, слоў віток...

\\
\\
Крыніца: Бічэль-Загнетава Д. Даўняе сонца: Лірыка. – Мн: Маст. літ., 1987. – 398 с.

 


===== Падобныя старонкі =====
  * [[творы/данута-бічэль-загнетава/данута-бічэль-загнетава-роднае-слова]]
  * [[творы/данута-бічэль-загнетава/данута-бічэль-загнетава-цётка]]
  * [[творы/данута-бічэль-загнетава/данута-бічэль-загнетава-не-называй-мяне-]]
  * [[творы/данута-бічэль-загнетава/данута-бічэль-загнетава-фальклор]]
  * [[творы/данута-бічэль-загнетава/данута-бічэль-загнетава-бяроза]]