~~META:
title = Генадзь Бураўкін — Я горка вінаваты...
&keywords = зноў, толькі, боль
&abstract = Чытаць верш Генадзя Бураўкіна "Я горка вінаваты..."
&iftrue = nan
~~

====== Генадзь Бураўкін — Я горка вінаваты... ======
Я горка вінаваты,\\
Што рваўся так,\\
Прасцяк,\\
З вясковай цеснай хаты\\
На гарадскі прасцяг.\\
\\
Я так наіўна верыў,\\
Што толькі там\\
Знайду\\
У свет нязнаны дзверы –\\
На шчасце ці бяду.\\
\\
Ну што ж –\\
Набыў вядомасць\\
I нейкі дабрабыт\\
I прыязджаў дадому\\
У госці ды ў грыбы.\\
\\
Ішоў на луг нясмела,\\
Як нёс валун даўгоў.\\
I ўсё душа балела\\
Забытаю тугой.\\
\\
I ўсё яе цягнула\\
На даўнія шляхі,\\
Да баравога гула\\
I ў цёмны сад глухі.\\
\\
I ўсё яна шукала\\
Дзіцячы тайны след.\\
I ўсё было ёй мала\\
I згадак, і прыкмет.\\
\\
Як быццам апраўдання\\
Хацела зноў і зноў\\
За боль расчаравання\\
I за нязбытнасць сноў...\\
\\
Ды час мінаў –\\
Я марыў\\
Паехаць ад крыніц\\
Да плошчаў і бульвараў,\\
Да шэрых камяніц.\\
\\
I зноў падслепавата\\
Мне пазіралі ўслед\\
Мая старая хата\\
I мой сівы сусед.\\
\\
I рваў душу мне одум,\\
Што,\\
Як ні гамані,\\
У дрэва ёсць заўсёды\\
Не толькі карані...\\
\\
1999

 


===== Падобныя старонкі =====
  * [[творы/генадзь-бураўкін/генадзь-бураўкін-калыханка]]
  * [[творы/генадзь-бураўкін/генадзь-бураўкін-я-хачу-прайсці-па-зямлі]]
  * [[постаці/генадзь-бураўкін]]
  * [[творы/генадзь-бураўкін/генадзь-бураўкін-шпак-спявае]]
  * [[творы/генадзь-бураўкін/генадзь-бураўкін-малітва]]