~~META:
title = Генадзь Бураўкін — Полаччына
&keywords = Полаччыну
&abstract = Чытаць верш "Полаччына" Генадзя Бураўкіна
&iftrue = nan
~~

====== Генадзь Бураўкін — Полаччына ======
Не шукайце красы за морамі,\\
Узбярэжжаў з крыштальнымі зорамі, –\\
Прыязджайце да нас на Полаччыну,\\
Пахадзіце яе прасторамі.\\
\\
Тут азёры, як неба, сінія,\\
У чаротах чароды гусіныя,\\
А на дне Млечным Шляхам свецяцца\\
Трапяткія гурты язіныя.\\
\\
Навальніцы грымяць над кручамі,\\
З гор бягуць ручаі грымучыя,\\
Тут ля Дрысы сасонкі звонкія,\\
Над Дзвіною бары пявучыя.\\
\\
Тут вясёлкай сонца акружана,\\
Усміхаецца з кожнай лужыны,\\
Тут на кожнага закаханага\\
Салаўёў па чатыры тузіны.\\
\\
Тут дзяўчаты ўсе – чарнабровыя,\\
На палях ільны двухметровыя…\\
Тут пад кожным курганам і каменем –\\
Ці быліна, ці казка чароўная…\\
\\
Дык навошта шукаць за морамі\\
Узбярэжжаў з крыштальнымі зорамі? –\\
Прыязджайце да нас на Полаччыну,\\
Пахадзіце яе прасторамі!..\\
\\
1956

 


===== Падобныя старонкі =====
  * [[творы/генадзь-бураўкін/генадзь-бураўкін-малітва]]
  * [[творы/генадзь-бураўкін/генадзь-бураўкін-я-хачу-прайсці-па-зямлі]]
  * [[постаці/генадзь-бураўкін]]
  * [[творы/генадзь-бураўкін/генадзь-бураўкін-калыханка]]
  * [[творы/генадзь-бураўкін/генадзь-бураўкін-шпак-спявае]]