~~META:
title = Генадзь Бураўкін — Куды б толькі ты ні пайшоў...
&keywords = буслы, жывое, кузюркі
&abstract = Чытаць верш Генадзя Бураўкіна "Куды б толькі ты ні пайшоў..."
&iftrue = nan
~~

====== Генадзь Бураўкін — Куды б толькі ты ні пайшоў... ======
Куды б толькі ты ні пайшоў,\\
Сустрэне прырода жывая:\\
Бясконцы шнурок мурашоў\\
Са сцежкаю сцежку сшывае;\\
Разважлівы хітры павук\\
Свой нерат пляце штохвіліны;\\
Як доктар пушчанскіх навук\\
Выстуквае дзяцел хваіны;\\
За колкім ажынным кустом\\
Сарока падскоквае вёртка;\\
З распушаным рыжым хвастом\\
Між сосен мільгае вавёрка;\\
Кузюркі кішаць у траве;\\
Цікуюць буслы за вужамі…\\
Усё, што жывое, –\\
Жыве,\\
Цябе быццам не заўважае.\\
\\
Не стой жа нядбайна адзін –\\
З усімі ў суседстве і згодзе\\
І ты сабе мудра знайдзі\\
Занятак і месца ў прыродзе…\\
\\
1999

 


===== Падобныя старонкі =====
  * [[творы/генадзь-бураўкін/генадзь-бураўкін-калыханка]]
  * [[постаці/генадзь-бураўкін]]
  * [[творы/генадзь-бураўкін/генадзь-бураўкін-шпак-спявае]]
  * [[творы/генадзь-бураўкін/генадзь-бураўкін-я-хачу-прайсці-па-зямлі]]
  * [[творы/генадзь-бураўкін/генадзь-бураўкін-малітва]]