~~META:
title = Генадзь Бураўкін — Дыялог з мурашом
&keywords = мураш
&abstract = Чытаць "Дыялог з мурашом" Генадзя Бураўкіна
&iftrue = nan
~~

====== Генадзь Бураўкін — Дыялог з мурашом ======
З вялізнай жоўтай саломінай –\\
Падгіналіся ногі аж –\\
Поўз па галінцы зломленай\\
Лупаты, лабаты мураш.\\
\\
Спыніўся, каб дых перавесці.\\
I я падышоў да яго.\\
– Слухай, – кажу, – урэшце\\
Рвешся ты так чаго?\\
\\
Ты ж ад работы чорны.\\
Аддыхайся, не спяшы.\\
Праўду пішуць вучоныя –\\
Дзіўныя вы, мурашы…\\
\\
Ён сеў ля саломіны чынна –\\
Пот блішчыць на ілбе:\\
– Вам памагаюць машыны.\\
А мы ж усё – на сабе.\\
\\
У вас і лазер, і атам,\\
I краны, і трактары.\\
А ў нас –\\
Шэсць лап слабаватых\\
Ды цёплае сонца ўгары.\\
\\
У нас трэба ўсё самому.\\
На ўласным сваім плячы\\
Колькі цяжкіх саломін\\
Трэба прывалачы!\\
\\
Выспацца нават некалі:\\
Лёг, а ўжо трэба ўставаць…\\
Паслухай,\\
Будзь чалавекам –\\
Не перашкаджай працаваць!..

 


===== Падобныя старонкі =====
  * [[ibdc.ped>салодкае-замарачэнне]]
  * [[постаці/генадзь-бураўкін]]
  * [[творы/генадзь-бураўкін/генадзь-бураўкін-калыханка]]
  * [[творы/генадзь-бураўкін/генадзь-бураўкін-малітва]]
  * [[творы/максім-танк/максім-танк-быліна-пра-касмічнае-падарож]]