Квецень асыпала вішня на росны гарод.
Певень заспаны ўзляцеў на паркан зухавата.
I над калодзежам рыпнуў стары калаўрот…
Гэта няспешна ступіла на вуліцу свята.

Зводдаль глядзяць вераб’і на памыты парог.
Ластаўка хоча бліжэй да акна прымасціцца.
Дыхае ў печы салодкі пшанічны пірог.
Пахнуць аерам пад ходнікам чыстым масніцы.

Дрэмлецца мірна на лаўцы рудому катку.
З-пад ручнікоў абразы узіраюцца строга.
Хата падмецена.
Венік прыткнуўся ў кутку.
Цёпла і ўтульна,
Нібыта за пазухай Бога.

1996

• незабыўнае
• андрэй-федарэнка/андрэй-федарэнка-вёска
• змітрок-бядуля/змітрок-бядуля-раніца-ў-вёсцы
• ларыса-геніюш/ларыса-геніюш-вясковы-дом
• іван-мележ/беларуская-вёска-ў-часы-калектывізацыі-ў