~~META:
title = Генадзь Бураўкін — Вясковая ідылія
&keywords = парог, гарод, свята
&abstract = Чытаць верш "Вясковая ідылія" Генадзя Бураўкіна
&iftrue = nan
~~

====== Генадзь Бураўкін — Вясковая ідылія ======
Квецень асыпала вішня на росны гарод.\\
Певень заспаны ўзляцеў на паркан зухавата.\\
I над калодзежам рыпнуў стары калаўрот…\\
Гэта няспешна ступіла на вуліцу свята.\\
\\
Зводдаль глядзяць вераб’і на памыты парог.\\
Ластаўка хоча бліжэй да акна прымасціцца.\\
Дыхае ў печы салодкі пшанічны пірог.\\
Пахнуць аерам пад ходнікам чыстым масніцы.\\
\\
Дрэмлецца мірна на лаўцы рудому катку.\\
З-пад ручнікоў абразы узіраюцца строга.\\
Хата падмецена.\\
Венік прыткнуўся ў кутку.\\
Цёпла і ўтульна,\\
Нібыта за пазухай Бога.\\
\\
1996

 


===== Падобныя старонкі =====
  * [[ibdc.ped>незабыўнае]]
  * [[творы/андрэй-федарэнка/андрэй-федарэнка-вёска]]
  * [[творы/змітрок-бядуля/змітрок-бядуля-раніца-ў-вёсцы]]
  * [[творы/ларыса-геніюш/ларыса-геніюш-вясковы-дом]]
  * [[творы/іван-мележ/беларуская-вёска-ў-часы-калектывізацыі-ў]]