~~META:
title = Віктар Гардзей — Ночы і цямнелі, і журыліся...
&keywords = пялёсткі, яблыня, сусвету, няхай, зямлі, зорныя, кружацца
&abstract = Чытаць верш Віктара Гардзея "Ночы і цямнелі, і журыліся..."
&iftrue = nan
~~

====== Віктар Гардзей — Ночы і цямнелі, і журыліся... ======
Ночы і цямнелі, і журыліся.\\
Толькі ж раптам пробліскі святла:\\
Зорныя пялёсткі закружыліся –\\
Яблыня Сусвету зацвіла!\\
\\
З вышыні пялёсткі ціха падаюць\\
На лугі, на лес, на сіні плёс.\\
Да людзей прыходзь ты са спагадаю,\\
Неспакойны і суровы лёс.\\
\\
Ствол такі шурпаты Шляху Млечнага, –\\
На зямлі пусціў ён карані.\\
Добрага, разумнага і вечнага\\
Не згараць зярняты і ў агні.\\
\\
З вераб’ём, і з салаўём, і з зяблікам\\
Яблыня Сусвету даражэй.\\
Поўня даспявае жоўтым яблыкам,\\
Да зямлі схіліўшыся ніжэй.\\
\\
I няхай ад шчасця вочы мружацца,\\
I няхай без жалю і слаты\\
Над планетай кружацца і кружацца\\
Зорныя пялёсткі дабраты.\\


\\
Крыніца: Галасы вёснаў: Сучасная беларуская паэзія / Уклад. А. І. Бельскі, У. А. Дзіско; – Мінск: Полымя, 1997. – 318 с.

 


===== Падобныя старонкі =====
  * [[творы/віктар-гардзей/віктар-гардзей-лясная-трывога]]
  * [[творы/віктар-гардзей/віктар-гардзей-падарожжа-ў-цельшына]]
  * [[творы/віктар-гардзей/віктар-гардзей-старыя-жорны]]
  * [[творы/віктар-гардзей/віктар-гардзей-бедная-басота-урывак]]
  * [[творы/віктар-гардзей/віктар-гардзей-каламутная-вада]]