~~META:
title = Віктар Гардзей — Лясная трывога
&keywords = насарог, белабока, сарока
&abstract = Чытаць верш Віктара Гардзея "Лясная трывога"
&iftrue = nan
~~

====== Віктар Гардзей — Лясная трывога ======
Між звяроў пайшла трывога,\\
Бо сарока зноў трашчыць:\\
– Бачу, бачу насарога,\\
Востры рог яго тырчыць.\\
\\
«Ён жа нас усіх раструшчыць! –\\
Дзікі жах бярэ звяроў. –\\
Насарог у нашай пушчы.\\
Ці не з Афрыкі прыйшоў?»\\
\\
А сарока балабоніць:\\
– Вунь на сцежцы насарог.\\
Уцякайце, бо дагоніць,\\
Мае ён тры пары ног!\\
\\
Хто ў імху,\\
А хто ў балоце –\\
Пахаваліся звяры.\\
Страх ваўкоў ажно калоціць,\\
I дрыжыць ліса ў нары.\\
\\
Белабока з усёй сілы\\
На кусце лазы крычыць:\\
– Насарог той мае крылы,\\
Як захоча – паляціць!\\
\\
Гэту вестку як пачулі,\\
Паўцякалі хто куды\\
Казадоі і зязюлі,\\
Курапаткі і дразды.\\
\\
Толькі зай пытае строга: –\\
Што яшчэ за насарог!\\
Ці ж бывае ў насарога\\
Два крылы, шасцёра ног?\\
\\
Белабокая сарока\\
Захіхікала ў лазе:\\
– То не з Афрыкі далёкай\\
Гэты насарог паўзе...\\
\\
I ў звяроў прайшла трывога.\\
Вылезлі яны з бярлог:\\
З чорнай спінкай,\\
З вострым рогам\\
Міма поўз жук-насарог...

 


===== Падобныя старонкі =====
  * [[творы/ян-баршчэўскі/белая-сарока]]
  * [[творы/васіль-вітка/васіль-вітка-сарочыны-блінцы]]
  * [[ibdc.ped>сарока-нянька]]
  * [[творы/віктар-гардзей/віктар-гардзей-сарочына-цырульня]]
  * [[ibdc.ped>сарока-белабока]]