~~META:
title = Васіль Хомчанка — Янкава рукавічка
&keywords = клубок, бабуля, коцік, траве, рукавічка, вязала, янка, рукавічку, матаў
&abstract = Чытаць апавяданне Васіля Хомчанкі "Янкава рукавічка"
&iftrue = True
~~

====== Васіль Хомчанка — Янкава рукавічка ======
Выйшла бабуля ў сад, села на ўслончык і пачала вязаць унуку Янку рукавічку.\\
Раніца была цёплая, ласкавая, грэла сонейка, пад страхой пішчалі вераб’і, а ў траве бегаў коцік.\\
Апоўдні рукавічка была амаль гатовая.\\
Вязала бабуля, вязала, ды, седзячы, і заснула.\\
Коцік убачыў клубок у траве, скокнуў да яго, торкнуў лапкай раз-другі, клубок і закаціўся ў кусты.\\
А там ляжаў Янка.\\
– Псік! – прагнаў ён коціка. Потым падняў клубок і пачаў намотваць на яго нітку. Матаў, матаў, а нітцы няма канца.\\
Бабуля прачнулася і пляснула ў далоні:\\
– Бацюхны мае! А дзе ж рукавічка?!\\
А ад рукавічкі адзін пальчык застаўся. Усю рукавічку Янка зноў на клубок пераматаў.

 


===== Падобныя старонкі =====
  * [[творы/васіль-хомчанка/васіль-хомчанка-яблык]]
  * [[творы/васіль-хомчанка/васіль-хомчанка-білеты-у-цырк]]
  * [[творы/васіль-хомчанка/васіль-хомчанка-дождж]]
  * [[творы/васіль-хомчанка/васіль-хомчанка-звон-пад-зямлёй]]
  * [[творы/васіль-хомчанка/васіль-хомчанка-дзве-дашы]]