~~META:
title = Васіль Хомчанка — Самы лепшы малюнак
&keywords = намаляваў, пеця, маці, посуд, пыласосам, бацька, падлогу, добра
&abstract = Чытаць апавяданне Васіля Хомчанкі "Самы лепшы малюнак"
&iftrue = nan
~~

====== Васіль Хомчанка — Самы лепшы малюнак ======
Маці падмятала падлогу, а Пеця сядзеў за сталом і маляваў.\\
– Мама, я цябе намалюю, – сказаў ён.\\
– Намалюй.\\
I Пеця намаляваў маці з венікам у руках.\\
Потым маці чысціла пыласосам дываны.\\
А Пеця таксама яе намаляваў.\\
Прыбраўшы ў кватэры, маці памыла на кухні посуд, наскрэбла бульбы. Пеця намаляваў яе і за гэтай працай.\\
Усе малюнкі расфарбаваў каляровымі алоўкамі. Прыгожая атрымалася маці.\\
Прыйшоў бацька з работы. Пеця адразу ж да яго, пахваліўся:\\
– Тата, зірні, якую я маму намаляваў.\\
Вось яна падлогу падмятае, а вось – з пыласосам. А тут толькі талеркі мые. Праўда, я добра намаляваў?\\
– Добра.\\
– А які самы лепшы малюнак?\\
– Той, які ты не намаляваў, – адказаў бацька.\\
– Які ж гэта?\\
– Дзе і ты памагаеш маме прыбіраць кватэру, мыць посуд, бульбу скрэбці. А не толькі малюеш.

 


===== Падобныя старонкі =====
  * [[творы/васіль-хомчанка/васіль-хомчанка-звон-пад-зямлёй]]
  * [[творы/васіль-хомчанка/васіль-хомчанка-дзве-дашы]]
  * [[творы/васіль-хомчанка/васіль-хомчанка-янкава-рукавічка]]
  * [[творы/васіль-хомчанка/васіль-хомчанка-яблык]]
  * [[творы/васіль-хомчанка/васіль-хомчанка-білеты-у-цырк]]