~~META:
title = Васіль Хомчанка — Паклон лесу
&keywords = лета, суніцамі, кошык, лесу
&abstract = Чытаць апавяданне Васіля Хомчанкі "Паклон лесу"
&iftrue = nan
~~

====== Васіль Хомчанка — Паклон лесу ======
Цябе чакае ў госці лес, напоены салодкім водарам кветак і ягад, гаркаватым пахам грыбоў... Будзь толькі добры з лесам, шчыры, і ён пакажа табе ўсе свае таямніцы, шчодра падзеліцца багаццем, што хавае ад благога вока.\\
У сярэдзіне лета лес усыпан суніцамі. Пунсовымі кроплямі зіхацяць яны ў траве, грэюць на сонцы круглыя бакі з жаўтаватымі зернеткамі-вяснушкамі. Ягады клічуць цябе, просяць: «Мы паспелі, бяры нас».\\
Вось тут і не будзь ганарысты, кланяйся лесу – і напоўніш кошык спелымі мядовымі суніцамі. Чым ніжэй будзеш кланяцца, тым паўней будзе кошык.\\
А калі лета пакоціцца на восень, пачнуць праз апалае лісце прабівацца крамяныя галоўкі баравікоў і падасінавікаў, збяруцца ў чародкі залатыя лісічкі, збягуцца ў падлесак белыя падбярозавікі, у роснай траўцы зачырванеюць крохкія рыжыкі.\\
I цяпер адбівай лесу паклоны. А будзеш задзіраць угору нос – нічога не знойдзеш, нічога не назбіраеш.

 


===== Падобныя старонкі =====
  * [[творы/васіль-хомчанка/васіль-хомчанка-яблык]]
  * [[творы/васіль-хомчанка/васіль-хомчанка-янкава-рукавічка]]
  * [[творы/васіль-хомчанка/васіль-хомчанка-звон-пад-зямлёй]]
  * [[творы/васіль-хомчанка/васіль-хомчанка-дзве-дашы]]
  * [[творы/васіль-хомчанка/васіль-хомчанка-білеты-у-цырк]]