~~META:
title = Васіль Хомчанка — Коска
&keywords = захарка, янка, стаяць, коскі, плысці, пішы, пісаць, сказаў, капітанаў, загад
&abstract = Чытаць апавяданне Васіля Хомчанкі "Коска"
&iftrue = True
~~

====== Васіль Хомчанка — Коска ======
Захарка сеў рыхтаваць урокі. Трэба было выканаць практыкаванне: перапісаць сказы і паставіць, дзе трэба, коскі. А рабіць Захарку нічога не хацелася. Ён падпёр далонямі галаву і задумаўся. Захарка толькі што прачытаў кніжку пра прыгоды капітана карабля.\\
Цікавае, гераічнае жыццё ў марскіх капітанаў. Не тое, што ў яго, Захаркі. Вучы граматыку. Захарка ўздыхнуў і сказаў уголас:\\
– Навыдумлялі ўсялякіх прадметаў. I ўсе іх вучы. Коскі там розныя, пытальнікі...\\
Пачуў гэта старэйшы брат Янка і спытаў:\\
– А ты б што хацеў вучыць?\\
– Хай бы адразу вучылі на касманаўтаў, капітанаў, шафёраў. А то вучаць, дзе коскі ставіць. Хіба без іх нельга жыць?\\
Янка даўно ведаў, што Захарка марыць стаць капітанам далёкага плавання. Ён трохі падумаў, хітра ўсміхнуўся і сказаў:\\
– Кажаш, і без косак можна пражыць? Мы зараз праверым. Бяры аловак і пішы.\\
– Што пісаць?\\
– Будзем лічыць, што ты ўжо капітан карабля. Табе трэба даць пісьмовы загад сваім матросам.\\
– Гэта я змагу, – абрадаваўся Захарка. Такі занятак усё ж цікавей, чым урокі рабіць. – Які загад, кажы!\\
– Ты хворы ці паранены ў бойцы з піратамі. Ляжыш у бальніцы.\\
– Нічога ты не разумееш у марской справе, – паправіў Янку Захарка. – Піратаў даўно ўжо няма.\\
– Добра, згодзен. Ты захварэў, ляжыш у бальніцы, а карабель стаіць у гавані. У моры шторм. Я твой памочнік, чакаю ад цябе пісьмовага загаду. Ты кажаш: плыві.\\
– Ну і плыві.\\
– Не, ты напішыі мне загад, – патрабаваў Янка.\\
Захарка рашуча падсунуў аркуш паперы, узяў аловак.\\
– Пісаць?\\
– Пішы, пішы.\\
I Захарка пад дыктоўку Янкі напісаў: «Плысці не дазваляю стаяць у гавані».\\
Прачытаў Янка і паціснуў плячыма:\\
– Нічога не разумею.\\
– Усё ясна, – сказаў упэўнена Захарка. – Я загадваю плысці.\\
– Не, не ясна. Ці плысці не дазваляеш і трэба стаяць, ці трэба плысці і стаяць не дазваляецца ў гавані. Не хапае коскі.\\
Захарка зморшчыў лоб і пачаў думаць, дзе б гэту самую коску паставіць. I паставіў пасля слоў «не дазваляю».\\
– Ну вось, значыць, трэба стаяць, – засмяяўся Янка.\\
– Я плысці дазволіў, – разгубіўся Захарка.\\
– Тадыі коска не тут павінна стаяць.\\
Янка закрэсліў Захаркаву коску і паставіў сваю пасля слова «плысці».\\
Захарка пачухаў патыліцу і падумаў, што сапраўды гэтыя коскі маюць значэнне нават і для марскіх капітанаў. Ён уздыхнуў, узяў падручнік па граматыцы, разгарнуў сшытак і пачаў пісаць практыкаванне.

 


===== Падобныя старонкі =====
  * [[творы/васіль-хомчанка/васіль-хомчанка-янкава-рукавічка]]
  * [[творы/васіль-хомчанка/васіль-хомчанка-дзве-дашы]]
  * [[творы/васіль-хомчанка/васіль-хомчанка-яблык]]
  * [[творы/васіль-хомчанка/васіль-хомчанка-звон-пад-зямлёй]]
  * [[творы/васіль-хомчанка/васіль-хомчанка-білеты-у-цырк]]