~~META:
title = Васіль Хомчанка — Гузік
&keywords = надзя, бабуля, гузік, іголку, сказала, дзякуй, прышыла, паліто
&abstract = Чытаць апавяданне Васіля Хомчанкі "Гузік"
&iftrue = nan
~~

====== Васіль Хомчанка — Гузік ======
Прыйшла Надзя са школы і сказала:\\
– Бабуля, у мяне гузік адарваўся. Прышый.\\
– Нясі, унучачка, іголку з ніткай. Прынесла Надзя іголку і шпульку нітак, аддала бабулі.\\
– Вочы мае дрэнна бачаць, – сказала бабуля. – Прадзень нітку ў іголку.\\
Надзя прадзела.\\
– А зараз вазьмі гузік, прыкладзі яго да паліто, вось сюды. Укалі іголку ў дзірачку. Так, правільна. Цяпер у другую.\\
Надзя рабіла так, як гаварыла бабуля, і не заўважыла, як гузік прышыла. Потым ужо сама агледзела ўсе гузікі на сваім паліто і сукенках. Дзе слаба трымаліся, падмацавала.\\
– Можа, і табе, бабуля, трэба дзе гузік прышыць? Давай я прышыю.\\
Знайшоўся такі гузік на ватоўцы – матляўся на адной нітцы. Надзя адарвала яго зусім і прышыла нанава.\\
– Дзякуй табе, бабуля, – з усмешкай сказала Надзя.\\
– За што дзякуй? Ты ж сама ўсё зрабіла.\\
– А за навуку.

 


===== Падобныя старонкі =====
  * [[творы/васіль-хомчанка/васіль-хомчанка-звон-пад-зямлёй]]
  * [[творы/васіль-хомчанка/васіль-хомчанка-яблык]]
  * [[творы/васіль-хомчанка/васіль-хомчанка-білеты-у-цырк]]
  * [[творы/васіль-хомчанка/васіль-хомчанка-янкава-рукавічка]]
  * [[творы/васіль-хомчанка/васіль-хомчанка-дзве-дашы]]