~~META:
title = Васіль Зуёнак — Я пакідаю галасы...
&keywords = пакідаю
&abstract = Чытаць верш "Я пакідаю галасы..." Васіля Зуёнка
&iftrue = nan
~~

====== Васіль Зуёнак — Я пакідаю галасы... ======
Я пакідаю галасы —\\
Звінець і ўноч і ўдзень:\\
Я пакідаю вам лясы\\
Маіх трывог, надзей.\\
Я пакідаю вам грахі:\\
Грыбное без грыбніц\\
I Глуск глухі, дзе з-пад страхі\\
Не шухнуць вераб'і,\\
Палёў пратручаную медзь,\\
Касяк свінцовых рыб, —\\
I ўсё каб той, надзённы, мець...\\
А вы інакш змаглі б?..\\
Я пакідаю вам правы\\
Мяне судзіць навек,\\
Крычаць, якія цацы вы.\\
А я? Не чалавек?\\
Як рыба ў помарак аб лёд,\\
Хіба не біўся я?\\
Я б мог схавацца за парод.\\
I ўсё ж — віна мая.\\
Я пакідаю вам зямлю\\
Такой, якая ёсць,\\
Якую трачу і люблю\\
I на якой не госць.\\
I толькі аб адным прашу:\\
Ідзіце на крыжы,\\
Каб нашай мовы весні шум\\
Усіх нас перажыў.

 


===== Падобныя старонкі =====
  * [[слоўнік/літаратурная-мова]]
  * [[слоўнік/мова-мастацкай-літаратуры]]
  * [[слоўнік/вершаваная-мова]]
  * [[слоўнік/аўтарская-мова]]
  * [[слоўнік/няўласна-простая-мова]]