~~META:
title = Васіль Зуёнак — Хто як мыецца
&keywords = гусак, коцік, пясок
&abstract = Верш Васіля Зуёнка "Хто як мыецца"
&iftrue = nan
~~

====== Васіль Зуёнак — Хто як мыецца ======
Раніцой да ручая\\
Ўся гусіная сям’я\\
Пакупацца ходзіць,\\
Карагоды водзіць.\\
А гусак на беражок\\
Выйдзе, дзюбай тыцкае:\\
"Дзе ж астатнія?! Няўжо\\
Ходзяць непамыцькамі?"\\
\\
Дык жа не, брат гусак, –\\
Тут усё крыху не так:\\
\\
Не ў крынічнай быстры\\
І не ў рэчцы дальняй, –\\
Тут у кожнага ў двары\\
Ёсць свая купальня.\\
\\
Там, дзе сонечны прыпёк,\\
Легла курачка ў пясок:\\
Пер’е, пух перасыпае –\\
Душ пясчаны прынімае.\\
\\
Побач з куркай верабей\\
На сябе пясок грабе,\\
Крылцамі трапеча –\\
Мые грудкі, плечы.\\
\\
А індык дзьме шчаку,\\
Хоча ўсё спытацца:\\
"Блу-блу-блу! – Ці ў пяску,\\
Ці ў вадзе купацца?.."\\
\\
Рукамыйніка няма,\\
І вада не выльецца:\\
Коцік так, насухама,\\
Коцік лапкай мыецца.\\
\\
А мурзаты парсючок\\
Аб штыкет пацёр бачок,\\
Мухамі акружаны,\\
Сігануў да лужыны:\\
Пакачаўся ў брудзе –\\
Вось і чысты будзе!..

 


===== Падобныя старонкі =====
  * [[творы/васіль-зуёнак/васіль-зуёнак-гаварыла-маці]]
  * [[творы/васіль-зуёнак/васіль-зуёнак-у-люстэрку-свіцязі]]
  * [[творы/васіль-зуёнак/васіль-зуёнак-сон]]
  * [[постаці/васіль-зуёнак]]
  * [[творы/васіль-зуёнак/васіль-зуёнак-у-грымотах-ашалелых-веку]]