~~META:
title = Васіль Зуёнак — Хату будзе воўк стаўляць...
&keywords = воўк, хату, птушка, стаўляць, вецер, звер, сонца, шэры, ладзіць, точыць, сякеру, гамонка, цесля
&abstract = Чытаць казку Васіля Зуёнка "Хату будзе воўк стаўляць..."
&iftrue = nan
~~

====== Васіль Зуёнак — Хату будзе воўк стаўляць... ======
Сем гадоў,\\
А можа, й дзесяць –\\
Пра адно гамонка ў лесе:\\
Птушка – птушцы,\\
А звер – зверу:\\
– Точыць, ладзіць воўк сякеру.\\
– А навошта?\\
– Як не знаць –\\
Хату будзе\\
Воўк стаўляць:\\
Сцены новыя\\
Ды сасновыя,\\
Аканіцы выразаныя –\\
У настой кары альховай\\
Фарбаваныя,\\
На падлозе\\
Блішчастыя масніцы,\\
Націраныя смалою-жывіцай.\\
Будзе ўзімку\\
На чарэні,\\
На ляжанцы,\\
Як улетку\\
На сонечнай палянцы:\\
І прыемна,\\
Хоць спякотна,\\
Неяк\\
Соладка-дрымотна, –\\
Грэй сабе бакі старыя...\\
...А пакуль што –\\
Вецер вые,\\
Вецер плача, вецер тужыць,\\
Вецер носіць золь ды сцюжу.\\
Сціхла,\\
Знікла ўсё жывое:\\
Хто ў дупле,\\
Хто пад зямлёю...\\
Ну а воўк?\\
А воўк – без хаты.\\
Сеў пад елкаю кашлатай,\\
Точыць, ладзіць воўк сякеру,\\
На язык лязо прабуе\\
І клянецца цесля шэры:\\
– Летам –\\
Хату пабудую!\\
\\
...Дні за днямі прамінулі...\\
Ў лесе птушкі ладзяць гулі,\\
Лета цёплае ў разгары.\\
Сонца грэе,\\
Сонца жарыць,\\
Па дзялянках воўк сігае, –\\
Дрэвы шэры выбірае:\\
Абухом па ліпе –\\
Бух!\\
Ліпа мяккая,\\
Як пух...\\
«Не, не дурань я стаўляць\\
Хату новую з гнілля».\\
А сасна – як тая печ, –\\
«Двое сутак будзеш сеч...»\\
Дуб стары і сукаваты...\\
«Не падыдзе ён для хаты».\\
Ад асіны – горкі дух...\\
«Лепш куплю к зіме кажух».\\
Сонца жарыць,\\
Смаліць з неба...\\
«Хата мне\\
Зусім\\
Не трэба...»\\
\\
Замарыўся цесля шэры,\\
Ад знямогі зубы шчэрыць...\\
А язык –\\
Бы стужка тая,\\
Што з-пад гэбля вылятае.\\
\\
...Сем гадоў,\\
А можа, й дзесяць –\\
Пра адно гамонка ў лесе:\\
Птушка – птушцы,\\
А звер – зверу:\\
– Точыць, ладзіць воўк сякеру...\\
– А навошта?\\
– Як не знаць –\\
Хату будзе\\
Воўк стаўляць...

 


===== Падобныя старонкі =====
  * [[ibdc.ped>нашы-хаты]]
  * [[ibdc.ped>хаты-беларусаў]]
  * [[творы/уладзіслаў-сыракомля/уладзіслаў-сыракомля-пра-маю-старую-хатк]]
  * [[ibdc.ped>просім-у-хату-госцейкі-нашы]]
  * [[ibdc.ped>людчына-хата]]