~~META:
title = Васіль Зуёнак — Урок паўтарэння
&keywords = чацвёрты, энергаблок, адолець, паўтараем
&abstract = Чытаць верш Васіля Зуёнка "Урок паўтарэння"
&iftrue = nan
~~

====== Васіль Зуёнак — Урок паўтарэння ======
Зноў лічэбнік... Жывым і мёртвым –\\
Паўтарэння зададзены ўрок...\\
Паўтараем: «кожны чацвёрты...»\\
І – «чацвёрты энергаблок...».\\
\\
Паўтараем... Настаўнік Чарнобыль\\
Нагадаў, нібы назнарок:\\
Той – чацвёрты – ваеннай пробы\\
І – чацвёрты – энергаблок...\\
\\
У палях, на лугах, на прысадах –\\
Нібы водгук на кожны крок –\\
Рэха чорнай атамнай здрады...\\
І – чацвёрты энергаблок.\\
\\
На ўзбалотку гараць журавіны,\\
Баравік залез на грудок,\\
А ў вачах – туман з Украіны...\\
І – чацвёрты энергаблок...\\
\\
І глядзіць – у чырвоных пражылках\\
Склератычным тварам лісток,\\
Што скідае клён на сцяжынку...\\
І – чацвёрты энергаблок.\\
\\
Чуюць Хойнікі, чуе Брагін\\
Жураўліны крык ля аблок:\\
Ні расінкі – адолець смагу...\\
І – чацвёрты энергаблок.\\
\\
Як прадвесце сусветнай пустэчы,\\
Як Зямлі патушаны зрок,–\\
Гэты з цёмнымі хатамі вечар...\\
І – чацвёрты энергаблок...\\
\\
Крочыць здань на хадулях ракетных...\\
Просіць свет надзеі глыток...\\
Б'юць у звон Чарнобыля ветры\\
І – чацвёрты энэргаблок.\\
\\
Ён гукае: устаньце, людзі,\\
Каб адолець ядзерны змрок,\\
Бо інакш – не жыццё ў нас будзе,\\
А чацвёрты энергаблок...

\\
\\
Крыніца: Зуёнак В. Лета трывожных дажджоў: вершы. – Мінск : Маст. літ., 1990. – 158 с.

 


===== Падобныя старонкі =====
  * [[творы/пімен-панчанка/пімен-панчанка-аб-самым-смачным]]
  * [[творы/алесь-пісьмянкоў/алесь-пісьмянкоў-1986]]
  * [[творы/мікола-мятліцкі/мікола-мятліцкі-санеты-чарнобыля]]
  * [[творы/артур-вольскі/артур-вольскі-боль-чарнобыля]]
  * [[творы/іншае/сучасная-літаратура-беларусі/тэма-чарнобыля-ў-беларускай-паэзіі]]