~~META:
title = Васіль Зуёнак — Развітанне Каліноўскага
&keywords = народ, толькі, знаю
&abstract = Чытаць верш Васіля Зуёнка "Развітанне Каліноўскага"
&iftrue = nan
~~

====== Васіль Зуёнак — Развітанне Каліноўскага ======
Хто адгадае і хто адкажа, –\\
Пакуль маўчыць народ,\\
Якая праўда на сэрца ляжа\\
Мне праз тысячу год?\\
\\
Адно толькі знаю: Бог нас пакінуў.\\
Страшней пятлі і турмы,\\
Калі мы ўсё яшчэ не краіна:\\
То край, то ўскраіна мы.\\
\\
Адно толькі знаю: паўстаць за волю –\\
Сваю – павінен народ.\\
Іначай вольным не быць ніколі.\\
Рэкі ўзрываюць лёд.\\
\\
Шляхі не купляюць за пяць капеек –\\
Бяруць іх жыццём сваім.\\
Бунт не на плошчы – у сэрцы спее\\
І памірае ў ім.\\
\\
Пакуль застаецца з нашага стану\\
Хоць бы адзін жывы,\\
То не лічыце справу прайгранай.\\
Народ прад’явіць правы.\\
\\
1983

\\
\\
Крыніца: Зуёнак В. Выбраныя творы. Уклад., камент. аўтара; прадм. Н. Заяц. – Мінск : Кнігазбор, 2010. – 512 с. («Беларускі кнігазбор»: Серыя 1. Мастацкая літаратура).

 


===== Падобныя старонкі =====
  * [[творы/міхась-кавыль/міхась-кавыль-кастусь-каліноўскі]]
  * [[творы/станіслаў-шушкевіч/станіслаў-шушкевіч-хай-літва-і-беларусь-]]
  * [[постаці/кастусь-каліноўскі]]
  * [[ibdc.ped>нявеста-каліноўскага]]
  * [[творы/іншае/кастусь-каліноўскі-мужыцкая-праўда]]