~~META:
title = Васіль Зуёнак — Ехаў дзед дадому...
&keywords = дзед
&abstract = Чытаць верш "Ехаў дзед дадому..." Васіля Зуёнка
&iftrue = nan
~~

====== Васіль Зуёнак — Ехаў дзед дадому... ======
Пэўна, вас не ўражу:\\
Дзед мой – проста дзед.\\
Пры вусах паважных\\
I пры барадзе.\\
Да навукі прыткі,\\
З тэхнікай дружыў.\\
Толькі перажытку\\
У транспарце не зжыў,–\\
Ні табе аўтобус,\\
Ні табе цягнік:\\
Дзед сваёй асобай\\
На кані прывык.\\
Клічуць на вяселле? –\\
Дружкі ды радня\\
На машыну селі...\\
Дзед запрог каня.\\
Гэтак і дадому\\
Пакацілі ўсе.\\
Ну, а дзед, вядома,\\
У развалкі сеў.\\
Лейцы напружыніў,\\
Глядзь – бяжыць дружбак:\\
У палку служылі\\
Разам як-ніяк!\\
– Ды заехаў вось бы\\
На хвілінак пяць...\\
Дзед уважыў просьбу:\\
Трэба начаваць...\\
Потым клікнуў цёзка,\\
Потым кум ды сват...\\
Ехаў дзед праз вёску\\
Тыдзень акурат.\\
Тут і перазовы\\
Падаспелі ўслед.\\
– Эх, гуляй, кірзовы\\
Тупнуў ботам дзед.\\
Бабцы, нібы з раю,\\
Тэлеграфаваў:\\
«Выехаць няма як:\\
Пугу нехта ўкраў»

 


===== Падобныя старонкі =====
  * [[творы/васіль-зуёнак/васіль-зуёнак-гаварыла-маці]]
  * [[творы/васіль-зуёнак/васіль-зуёнак-сон]]
  * [[постаці/васіль-зуёнак]]
  * [[творы/васіль-зуёнак/васіль-зуёнак-у-грымотах-ашалелых-веку]]
  * [[творы/васіль-зуёнак/васіль-зуёнак-у-люстэрку-свіцязі]]