~~META:
title = Васіль Зуёнак — Гаварыла маці...
&keywords = маці
&abstract = Чытаць верш Васіля Зуёнка "Гаварыла маці..."
&iftrue = nan
~~

====== Васіль Зуёнак — Гаварыла маці... ======
Ціхія ўспаміны –\\
Горкае багацце...\\
Весняй ночкай з сынам\\
Гаварыла маці:\\
– Ночка дарагая,\\
Колькі ж летаў буду\\
У хаце жыць адна я\\
З думак цяжкай грудай?\\
Толькі іх і знаю,\\
Покуль не прыднее...\\
Набяру-тка маю –\\
Можа, расквітнее?..\\
Ходзіць з хлебам-соллю\\
Гул бяседы весняй,\\
Толькі ў нас застолле\\
Усе забыла песні.\\
У людзей унукі –\\
Грыўкі ільняныя,\\
А мае ж во рукі\\
Па дзіцятках ныюць...\\
Гаварыла маці –\\
Што ёй сын адкажа?\\
А ці зноўку ў хаце\\
Немата заляжа?..\\
– Не крыўдуй на сына:\\
Я і сам не знаю,\\
Як вясну пакінуў\\
Тым грымотным маем.\\
Вечна застануся –\\
Вольны, не жанаты:\\
Хто ж, скажы, мамуся,\\
Пойдзе ў маю хату,\\
Што ў далёкім краі,\\
Што ў чужым куточку –\\
Цёмная, сырая,\\
З жоўтага пясочку?..

 


===== Падобныя старонкі =====
  * [[ibdc.ped>сустрэча-з-маці]]
  * [[творы/янка-золак/янка-золак-ода-маці]]
  * [[ibdc.ped>да-маці]]
  * [[ibdc.ped>i-надыходзіць-дзень]]
  * [[ibdc.ped>на-скрыжаванні]]