~~META:
title = Васіль Зуёнак — Будучыня
&keywords = народ, гісторыю, край, скрыжалях, вяртае
&abstract = Чытаць верш Васіля Зуёнка "Будучыня"
&iftrue = nan
~~

====== Васіль Зуёнак — Будучыня ======
Гісторыкі сцвярджаюць:\\
Спазніўся мой народ\\
Здзяржавіць на скрыжалях\\
Свой шлях і радавод.\\
\\
А я гляджу іначай:\\
А што, хіба крывіч\\
Нам крэўнасць не пазначыў\\
У храмах на крыві?\\
Ці не крышыў радзіміч\\
Прышэльцаў на жарству,\\
Не шанаваў Радзіму,\\
Не мацаваў Літву?\\
\\
Ці дрыгавіч-балотнік\\
Лёс у дрыгве праспаў?..\\
\\
Не! – край мой не гаротнік –\\
Мой край з вякоў паўстаў.\\
\\
Народ мой старажытны –\\
І волат, і ратай, –\\
І з ворагам быў квіты,\\
І давяраў братам.\\
\\
Ні ў кога, апроч нівы,\\
Ён хлеба не прасіў…\\
Ды юную наіўнасць\\
Заўжды ў душы насіў.\\
\\
Па славу на скрыжалях\\
Не шастаў да багоў, –\\
Таму й параскрадалі\\
Гісторыю ў яго.\\
\\
Цяпер – цяпер з братамі\\
Мужуе пакрысе –\\
Гісторыю вяртае,\\
Ды аддаюць не ўсе…\\
\\
Ну што ж, мы не з драпежных,\\
Але зважай, сусед,\\
Што нас да ўласных сцежак\\
Вяртае запавет.\\
\\
Яшчэ не вечарэе –\\
Узвесняцца грамы! –\\
Бо памяць не старэе,\\
А разам з ёй і мы.\\
\\
І не ў чарзе па труны\\
Мы ў вечнасці стаім:\\
Народ мой самы юны,\\
І – будучыня з ім!..

\\


 


===== Падобныя старонкі =====
  * [[творы/якуб-колас/служэнне-народу-асноўны-абавязак-мастака]]
  * [[творы/якуб-колас/якуб-колас-народ-у-трылогіі-на-ростанях-]]
  * [[творы/юрась-свірка/юрась-свірка-верны-крэўнаму-брацтву]]
  * [[ibdc.ped>душа-народа]]
  * [[творы/максім-лужанін/максім-лужанін-беларускаму-народу]]