~~META:
title = Васіль Зуёнак — Будзем сілы набірацца
&keywords = юзя, бабка, унучак, дзень, сілы, набірацца
&abstract = Верш Васіля Зуёнка "Будзем сілы набірацца"
&iftrue = nan
~~

====== Васіль Зуёнак — Будзем сілы набірацца ======
Лета Юзю прывяло\\
На канікулы ў сяло.\\
Рады дзед, і бабка рада –\\
Напякла стажок аладак:\\
– Еш, унучак, папраўляйся,\\
Сіл, унучак, набірайся…\\
Спалавініў Юзя «стог»,\\
У цяньку спачыць прылёг.\\
Падрамаў на жываце –\\
Дзень да поўдня праляцеў,\\
Павярнуўся на спіну –\\
Дзень даўным-даўно мінуў…\\
Ранкам выйшаў у паход –\\
Аж за школьны агарод.\\
Толькі ж трэба так, скажыце:\\
Заблудзіўся Юзя ў жыце…\\
Не відаць ні хат, ні сонца…\\
Нібы ў джунглях тых бясконцых,\\
Крочыў Юзя так і гэтак,\\
Вызначаў напрамкі свету,\\
Бабку, дзеда\\
Небарака\\
Клікаў, клікаў – і заплакаў:\\
– Не бадзяцца, не стамляцца –\\
Ехаў сілы набірацца…\\
Дык нашто ж,\\
Нашто я лез\\
У дрымучы гэты лес!..\\
Працаваць юннаты йшлі,\\
Юзю беднага знайшлі\\
І сказалі:\\
– Годзе хныкаць,\\
Лепш вазьмі-тка, брат, матыку –\\
Папрацуем у ахвоту\\
Ды ў футбол згуляем потым,\\
Загараць пачнём, купацца –\\
Будзем сілы набірацца!

 


===== Падобныя старонкі =====
  * [[творы/васіль-зуёнак/васіль-зуёнак-у-люстэрку-свіцязі]]
  * [[творы/васіль-зуёнак/васіль-зуёнак-сон]]
  * [[творы/васіль-зуёнак/васіль-зуёнак-гаварыла-маці]]
  * [[постаці/васіль-зуёнак]]
  * [[творы/васіль-зуёнак/васіль-зуёнак-у-грымотах-ашалелых-веку]]