~~META:
title = Васіль Жуковіч — Скалечаны голуб
&keywords = галубочак, гора, крошкі
&abstract = Верш Васіля Жуковіча "Скалечаны голуб"
&iftrue = nan
~~

====== Васіль Жуковіч — Скалечаны голуб ======
Галубочак аднаногі,\\
дзень галодны твой згарае.\\
Пачакай жа, я з дарогі\\
прыбярог табе акраец.\\
\\
Ну, хутчэй збірай жа крошкі:\\
верабейкі сталі хапаць...\\
Падляці бліжэй хоць трошкі!\\
Ты баішся ў рукі трапіць?\\
\\
Асцярожны стаў ад гора,\\
гэта гора, як забудзеш!\\
Ад паўстанку блізка горад –\\
вельмі розныя там людзі...\\
\\
Пэўна, там згубіў ты ножку;\\
паплаціўся за што ёю?\\
Пэўна, быў пасыпаў крошкі\\
хтосьці жорсткаю рукою.\\
\\
Як цяпер ты?.. Дзе начуеш?\\
Дзе сяброўка, галубочак?\\
Вось і поезд мой, ці чуеш,\\
як ён свішча, як грукоча?\\
\\
Ну, паехалі са мною!\\
Рады волі ты галоднай!..\\
Як жа выжывеш зімою\\
на зямлі пустой, халоднай?

 


===== Падобныя старонкі =====
  * [[творы/васіль-жуковіч/васіль-жуковіч-зіма]]
  * [[творы/васіль-жуковіч/васіль-жуковіч-слухай-родную-прыроду]]
  * [[творы/васіль-жуковіч/васіль-жуковіч-жураўліны-вырай]]
  * [[творы/васіль-жуковіч/васіль-жуковіч-адляцелі-жураўлі]]
  * [[творы/васіль-жуковіч/васіль-жуковіч-першы-снег]]