~~META:
title = Васіль Жуковіч — Небяспечная зона
&keywords = кіламетрам, подых, замрэш, ідзеш, адчыняцца
&abstract = Чытаць верш Васіля Жуковіча "Небяспечная зона"
&iftrue = nan
~~

====== Васіль Жуковіч — Небяспечная зона ======
Асірацелі сцяжынкі, двары,\\
вокны паслеплі, паглухнулі дзверы.\\
Дзе вы, палескія гаспадары?\\
Вунь вас чакаюць антонаўкі, бэры.\\
\\
Што ім, садам, зелянеюць сады,\\
як і раней, квітнеюць вазоны...\\
Людзі не вернуцца болей сюды:\\
тут – небяспечная зона!\\
\\
Рэштка жыцця на падворках пустых –\\
куры галодныя і кураняты,\\
з ганкаў ніхто не пакліча ўжо іх, –\\
тут не адчыняцца хаты.\\
\\
Як і куды, небяспека, ідзеш?\\
Дзе ты замрэш, за якім кіламетрам?\\
Што ты з сабой нам сягоння нясеш,\\
подых паўднёвага цёплага ветру?\\
\\
Хто гэта мог бы падумаць калі,\\
што пад ласкавай сінечаю неба\\
ўзнікнуць на нашай свяшчэннай зямлі\\
могілкі вернай карміцелькі глебы?!

 


===== Падобныя старонкі =====
  * [[творы/пімен-панчанка/пімен-панчанка-аб-самым-смачным]]
  * [[творы/артур-вольскі/артур-вольскі-боль-чарнобыля]]
  * [[творы/іншае/сучасная-літаратура-беларусі/тэма-чарнобыля-ў-беларускай-паэзіі]]
  * [[творы/алесь-пісьмянкоў/алесь-пісьмянкоў-1986]]
  * [[творы/мікола-мятліцкі/мікола-мятліцкі-санеты-чарнобыля]]