~~META:
title = Васіль Жуковіч — Калі прыходзіць дзед Мароз?
&keywords = дзед, браты, мароз, падарункі, братоў
&abstract = Чытаць верш Васіля Жуковіча "Калі прыходзіць дзед Мароз?"
&iftrue = nan
~~

====== Васіль Жуковіч — Калі прыходзіць дзед Мароз? ======
Браты Алеська і Максім,\\
Жывуць на свеце белым.\\
Не ўсё пакуль вядома ім,\\
Не ўсё ім зразумела.\\
Пытанне ўзнікла ўсур'ёз\\
У двух братоў аднойчы:\\
«Калі прыходзіць Дзед Мароз?»\\
«Калі ж? Напэўна, ноччу».\\
Якраз у ноч пад Новы год\\
Браты амаль не спалі,\\
Мароза-дзеда ўсё ж прыход,\\
Падобна, прамаргалі.\\
Бо раніцой знайшлі браты\\
Пад ёлачкай пакункі,\\
Ляжалі ў пакунках тых\\
Сямейцы падарункі.\\
Было там дзіва для братоў –\\
Яны не разумелі,\\
З двара як Дзед Мароз прыйшоў,\\
Што й дзверы не рыпелі.\\
Які цудоўны Дзед Мароз:\\
Нясе такую ношу!\\
Вось падарункі ўсім прынёс\\
I ўсім настрой харошы.

 


===== Падобныя старонкі =====
  * [[творы/васіль-жуковіч/васіль-жуковіч-мароз]]
  * [[творы/янка-купала/янка-купала-мароз]]
  * [[ibdc.ped>прывакзальная-плошча]]
  * [[ibdc.ped>аер]]
  * [[творы/цішка-гартны/цішка-гартны-зімовы-вечар]]