~~META:
title = Васіль Жуковіч — Залацінкі
&keywords = паданні, сказы, багацце, чытайце, адказы, легенды, залацінкі
&abstract = Чытаць верш Васіля Жуковіча "Залацінкі"
&iftrue = nan
~~

====== Васіль Жуковіч — Залацінкі ======
Праз тоўшчу стагоддзяў – з глыбінкі –\\
прабіліся слоў залацінкі.\\
Пранеслі іх сэрцы людскія,\\
няўрымслівыя, памяткія.\\
Легенды, паданні і сказы –\\
на мноства пытанняў адказы.\\
Ці добра скупым быць? Не чулі?\\
Чытайце тады «Пра зязюлю»,\\
як птушкай сястра тая стала,\\
што брата не шкадавала.\\
Ну а ці існуе багацце,\\
што можа бяздонным назвацца?\\
Адказ на такое пытанне\\
вы знойдзеце ў мудрым паданні.\\
Адкрыецца вам таямніца:\\
такое багацце – зямліца.\\
Цікавіць паходжанне рэчак,\\
азёр, гарадоў і мястэчак –\\
чытайце і ўдзень вы і нанач\\
пра Сож, і Дняпро, і пра Нарач,\\
пра Менск, Магілёў і Бярэсце.\\
А можа, чыталі вы дзесьці\\
пра Стоўбцы, Нясвіж і Валожын,\\
Узду, Брагін, Браслаў ці, можа,\\
пра Дывін, Капыль, Маладзечна...\\
Ёсць слодыч у слове адвечным.\\
Легенды, паданні і сказы –\\
вяртанні, пытанні, адказы.

\\
\\
Крыніца: Залацінкі: Зборнік вершаваных твораў. Мінск: Беларусь, 2001. – 235 с.

 


===== Падобныя старонкі =====
  * [[творы/васіль-жуковіч/васіль-жуковіч-адляцелі-жураўлі]]
  * [[творы/васіль-жуковіч/васіль-жуковіч-жураўліны-вырай]]
  * [[творы/васіль-жуковіч/васіль-жуковіч-зіма]]
  * [[творы/васіль-жуковіч/васіль-жуковіч-першы-снег]]
  * [[творы/васіль-жуковіч/васіль-жуковіч-слухай-родную-прыроду]]