~~META:
title = Васіль Жуковіч — Бусел над Хатынню
&keywords = пакружыўся, бусел, хатынню
&abstract = Чытаць верш Васіля Жуковіча "Бусел над Хатынню"
&iftrue = nan
~~

====== Васіль Жуковіч — Бусел над Хатынню ======
Пакружыўся над Хатынню бусел\\
сонечна-пагодлівай вясною:\\
каміны стаяць. І людзі ў скрусе.\\
А нідзе хаціны ні адной.\\
\\
Заміраюць галасы людскія,\\
гукі абуджальнае вясны,\\
і плывуць трывожныя такія,\\
тонкія жалобныя званы.\\
\\
Пакружыўся над Хатынню бусел\\
і паплыў у светлую смугу.\\
Ён не ведаў болю Беларусі,\\
пэўна ж, ён адчуў яе тугу.\\
\\
Пакружыўся бусел над Хатынню\\
і ў смузе пад воблакамі знік.\\
Папялішча ўсё яшчэ не стыне,\\
і ў грудзях не замірае крык.

 


===== Падобныя старонкі =====
  * [[творы/анатоль-вярцінскі/анатоль-вярцінскі-вечны-сон-вечны-звон]]
  * [[ibdc.ped>званы-хатыні]]
  * [[творы/аркадзь-куляшоў/аркадзь-куляшоў-над-спаленай-вёскай]]
  * [[ibdc.ped>званы-памяці]]
  * [[творы/алесь-адамовіч/алесь-адамовіч-хатынская-аповесць]]