~~META:
title = Васіль Жуковіч — Беларус
&keywords = белы, роднай, ручнік, абрус
&abstract = Чытаць верш Васіля Жуковіча "Беларус"
&iftrue = nan
~~

====== Васіль Жуковіч — Беларус ======
Белы ручнік мой, белы абрус,\\
сам я няцёмны душою.\\
Хто ў белым свеце я?

Я – беларус, –

будзьце знаёмы са мною.\\
\\
Дружбу цаню і гатовы дружыць\\
я ці не з цэлым сусветам.\\
Свету адкрыты, хачу вольна жыць,\\
добрым служыць запаветам.\\
\\
Яркая зорка надзеі гарыць,\\
торыцца шлях наш вякамі.\\
Шчасце трывалае можна стварыць\\
толькі сваімі рукамі.\\
\\
Можна ў далёкіх краінах пабыць –\\
хай там марскіх, а ці горных...\\
Нельга радзімых мясцінаў забыць,\\
фарбаў лясных і азёрных.\\
\\
Пасябраваць можна з мовай чужой,\\
ёю валодаць свабодна;\\
нельга адно здрадзіць роднай сваёй\\
і адрачыся ад роднай.\\
\\
Белы ручнік мой, белы абрус.\\
Вышыла мама кашулю.\\
Не прамяняю сваю Беларусь –\\
не выбіраю матулю.

 


===== Падобныя старонкі =====
  * [[творы/алесь-разанаў/алесь-разанаў-радзіма]]
  * [[ibdc.ped>ганарымся-бацькаўшчынай]]
  * [[ibdc.ped>скарбы-нашай-радзімы]]
  * [[творы/янка-купала/тэма-народнага-жыцця-і-любоў-да-радзімы-]]
  * [[творы/алесь-бачыла/алесь-бачыла-радзіма-мая-дарагая]]