~~META:
title = Васіль Вітка — Страшная казка
&keywords = казка
&abstract = Чытаць апавяданне Васіля Віткі "Страшная казка"
&iftrue = True
~~

====== Васіль Вітка — Страшная казка ======
\\
Наташка і Стасік доўга не засыналі. А бабцы хацелася, каб яны спалі. Бабка збіралася ў госці. Яна абяцала, што прынясе пірага. Смачнага, салодкага. Нават кот, які сядзеў на пасцелі, і той не вытрымаў, аблізнуўся.\\
— Раскажы нам казку, — папрасіў Стасік, — а тады ідзі сабе.\\
Бабка расказала казку. Страшную, пра ваўка. Стасік прыцішыўся. А Наташка пачала плакаць:\\
— Бабка, не ідзі. Мне страшна.\\
— Добра, я не пайду. Спіце, дзеткі. Я каля вас буду сядзець...\\
Як толькі дзеці пазасыналі, бабка надзела новую кофту, завязала белую хустку і нават у люстэрка паглядзелася. Толькі яна там нічога не ўбачыла, бо было ўжо цёмна. А запальваць святло яна пабаялася, каб не пабудзіць дзяцей.\\
«А калі і праўда папрачынаюцца, а мяне не будзе, — падумала бабка, — яны ж з плачу пазаходзяцца...»\\
Але бабцы вельмі хацелася пайсці ў госці. I тады яна надумалася зрабіць другую бабу. Узяла дзве падушкі, надзела на іх старую сукенку, а малую падушку абвязала хустачкай і паклала зверху...\\
Стасіку ўночы захацелася піць. I ён праз сон папрасіў:\\
— Малачка...\\
Ніхто на абазваўся. Тады Стасіку яшчэ мацней захацелася малачка, і ён прачнуўся. Баба сядзела на сваім месцы.\\
— Бабка! — гукнуў Стась.\\
Але бабка нават не варухнулася. Тады Стасік падсунуўся бліжэй і хацеў яе пабудзіць. Толькі крануў за плечы, а яна ўзяла і з’ехала з ложка далоў.\\
Стасік спалохаўся і пабудзіў Наташку. Але тут яны ўбачылі нешта яшчэ больш страшнае. З цемры на іх глядзелі блішчастыя вочы. Якраз як у таго звера, пра якога бабка расказвала казку.\\
— Воўк! — крыкнула Наташка.\\
— М-м-яў!.. — азваўся воўк.\\
Дзеці пазналі ката Кузьму. А той пачаў лашчыцца да іх, залез пад коўдру і заспяваў ціхую знаёмую песню.\\
Цяпер Наташы і Стасіку было не страшна. Хутка яны заснулі зноў. Прачнуліся толькі раніцай і зусім не пакрыўдзіліся на бабку, бо яна такі стрымала сваё слова. Дала кожнаму па вялікаму кавалку салодкага пірага. А коціку не здагадалася даць. Тады Стасік сказаў:\\
— Бабка, дай коціку. ён пільнаваў нас. З ім нам ніякі воўк не страшны.\\
Бабка дала пірага і коціку.

\\
1958

 


===== Падобныя старонкі =====
  * [[творы/васіль-вітка/васіль-вітка-вавёрчына-гора]]
  * [[творы/максім-танк/максім-танк-казка-пра-музыку]]
  * [[слоўнік/казка]]
  * [[творы/васіль-вітка/васіль-вітка-ппш]]
  * [[творы/васіль-вітка/васіль-вітка-казкі-і-краскі]]