~~META:
title = Васіль Вітка — Лістапад
&keywords = Вітка, лістапад
&abstract = Чытаць верш "Лістапад" Васіля Віткі
&iftrue = nan
~~

====== Васіль Вітка — Лістапад ======
//Алене Васілевіч//

Колькі ўжо доле асенняга золата,\\
Які мне пад ногі пасланы раскошны кілім!\\
Дрэвы мае, не ўладаром і не волатам,\\
Паслушнікам чорным гатоў я служыць вам усім.\\
\\
Шапку здыму і ў цішы пастаю\\
Разам на службе ўрачыстай,\\
Да вашай малітвы далучыўшы сваю\\
Перад прычасцем прачыстым.\\
\\
Счарнелі і вы ўжо да самых галоў\\
На гэтай жалобе па ўсім, што было,\\
Што ў траўні так незабыўна цвіло,\\
А ў жніўні водарным дзівам лягло\\
\\
На бедны мой стол, дзе пішу гэты верш\\
I свой папяровы ліст варушу,\\
Успамінаючы ўсіх вас найперш,\\
Ваш кожны лісток, што шуміць увушшу.\\
\\
А зімку ж вам выстаяць зноў на камлі,\\
На каранях, дзе цяплей і не цесна.\\
Без каранёў, хоць і схаваны ў зямлі,\\
Ніхто яшчэ не ажыў увесну.\\
\\
21.10.1995

 


===== Падобныя старонкі =====
  * [[творы/станіслаў-шушкевіч/станіслаў-шушкевіч-лістапад]]
  * [[ibdc.ped>кінафестываль-лістапад]]
  * [[творы/віктар-гардзей/віктар-гардзей-залаты-лістапад]]
  * [[творы/эдуард-акулін/эдуард-акулін-асенні-рытурнэль]]
  * [[творы/васіль-вітка/васіль-вітка-лістапад-946]]