~~META:
title = Васіль Вітка — Казка пра зязюлю
&keywords = лазовым, пералазам, снапочкі
&abstract = Чытаць "Казку пра зязюлю" Васіля Віткі
&iftrue = nan
~~

====== Васіль Вітка — Казка пра зязюлю ======
За лазовым пералазам\\
Загуменнага завулачка,\\
На аселіцы за вязам\\
Лён пасеяла зязюлечка.\\
\\
Ні часіны не згуляла,\\
Рупілася, даглядала,\\
А паспеў лянок – парвала,\\
У снапочкі павязала.\\
\\
Паглядзела на снапочкі\\
І заплакала зязюля:\\
– Дзе мае сыны і дочкі,\\
Для каго мне шыць кашулі?\\
\\
Зарыдала, закувала…\\
І пайшлі скрозь пагалоскі:\\
Не раса на поле пала,\\
А зязюльчыныя слёзкі.\\
\\
І цяпер яна кукуе,\\
Адзіноту праклінае.\\
Хто сівую пашкадуе,\\
Сіраце паспачувае?\\
\\
За лазовым пералазам\\
Болей я не быў ні разу,\\
Ды не мог забыць ні разачку\\
Даўнюю, старую казачку.\\
\\
Завязаўся горкі вузел\\
Там у полі, ў лесе, ў лузе.\\
А хто зможа і развяжа –\\
Казку новую раскажа.

 


===== Падобныя старонкі =====
  * [[творы/янка-брыль/птушкі-i-гнёзды-сцюдзёны-вырай-аповесць-]]
  * [[творы/янка-брыль/увесь-свет-адзін-дом-па-раману-янкі-брыл]]
  * [[творы/янка-брыль/птушкі-i-гнёзды-гнёзды-за-дымам-аповесць]]
  * [[творы/янка-брыль/раман-янкі-брыля-птушкі-і-гнёзды-вобраз-]]
  * [[ibdc.ped>птушкі-шчасця]]