~~META:
title = Васіль Вітка — Дзеці на парашутах
&keywords = кветка, радасна, сонейка, чмель, кветка-маці, прыдумала, сказала, сваякі, белыя, травы, прыгрэла
&abstract = Чытаць апавяданне Васіля Віткі "Дзеці на парашутах"
&iftrue = nan
~~

====== Васіль Вітка — Дзеці на парашутах ======
Вясною, як толькі прыгрэла сонейка, яна першаю выглянула з сухой леташняй травы і адразу расцвіла жоўтым цветам. Азірнулася вакол, бачыць: выглянулі з травы і расцвілі іншыя кветкі – маленькія жоўтыя сонейкі.\\
– Гэта мае сваякі, – сказала кветка, і ёй стала радасна, што яна не адна на свеце.\\
Але з кожным днём прыгравала сонейка, і кветка пачала сівець.\\
Замест жоўтай зрабілася белай-белай.\\
– Што ж цяпер будзе? – спалохалася яна, бо ўбачыла, што ўсе яе сваякі таксама белыя. Чуе кветка: ляціць цяжкі касматы чмель.\\
Яна ведала гэтага чмяля. Ён часта лятаў тут і гудзеў сваім тоўстым голасам, збіраў мёд і ніколі не мінаў яе пялёстачкаў.\\
– Што будзе? – трывожна спыталася кветка. – Няўжо я загіну і загіне ўся мая радня?\\
Мудры чмель ёй сказаў:\\
– Не палохайся. На той год закрасуеш ізноў. Толькі трэба зрабіць так, каб твае дзеці разляцеліся як мага далей.\\
– А як мы разляцімся? У маіх жа дзетак няма крылаў?\\
Мудры чмель думаў-думаў і нічога не прыдумаў.\\
– Думай сама, – сказаў ён. Загуў як самалёт і паляцеў.\\
Доўга думала кветка-дзьмухавец і нарэшце радасна ўсклікнула:\\
– Прыдумала! – і пачала кветка-маці шыць сваім дзеткам белыя шаўковыя парашуцікі. І толькі дзьмухнуў ветрык, паляцелі сынкі і дачушкі – кожны на сваім белым парашуціку. І кожны стараўся адляцець далей. Хто дзе ўпаў – там і заснуў да будучай вясны.\\
А як толькі пасля зімы прыгрэла сонейка, прачнулася маці, глянула – а навокал жоўта ад кветак.\\
– Як я добра прыдумала! – радасна сказала кветка-маці.

 


===== Падобныя старонкі =====
  * [[творы/васіль-зуёнак/васіль-зуёнак-гарлачык]]
  * [[творы/васіль-вітка/васіль-вітка-казкі-і-краскі]]
  * [[творы/міхась-зарэцкі/міхась-зарэцкі-кветка-пажоўклая]]
  * [[творы/уладзімір-дубоўка/уладзімір-дубоўка-верас]]
  * [[творы/янка-журба/янка-журба-дзяўчынка-і-кветкі]]