~~META:
title = Васіль Вітка — Дагараюць кастры…
&keywords = толькі, вечна, раніца, вось, высь
&abstract = Чытаць верш Васіля Віткі "Дагараюць кастры…"
&iftrue = nan
~~

====== Васіль Вітка — Дагараюць кастры… ======
Дагараюць кастры…\\
I як доўгая дзедава казка,\\
Абзываецца ноч\\
Таямнічасцю гукаў і слоў.\\
Я не сплю.\\
Дзесьці коні жалезнымі путамі ляскаюць.\\
Месяц з неба,\\
Бы спуджаны лебедзь,\\
Вось нырнуў і пагас\\
За далёкім заснулым сялом.\\
\\
Кажуць,\\
Рана да ўсходу\\
Выходзіць русалка-дзяўчына\\
I збірае ў прыпол квець апалую, ліст.\\
З кашміровай касою,\\
Залатымі вачыма…\\
Толькі гэта ўсё ў песні.\\
Пра дзявочую долю і весну\\
Мне спявала,\\
Расказвала маці калісь.\\
\\
Высь, далёкая высь,\\
I прасторы, прасторы…\\
Вечна б так –\\
Маладосць і жыццё,\\
Вечна б сэрцам палаць,\\
Як вясновыя зоры,\\
Каб ніколі не гас\\
Запаветны касцёр.\\
\\
Чарадзейныя мары\\
Наплываюць,\\
Мяняюцца.\\
Вось даносіцца з вёскі\\
Першы пеўневы ўскрык.\\
Хутка раніца,\\
Свежая, золкая раніца.\\
Туманом малачаевым\\
Без трывогі адчайнае\\
Незабыўная, ціхая ноч дагарыць,\\
Дагараць і кастры.\\
\\
Затрапеча лістамі асіна\\
I прачнецца,\\
I болей ужо не засне.\\
Ёй адной, толькі ёй\\
Я даверу ўспаміны,\\
Сваю першую казку\\
Аб начлежнай вясне.\\
\\
1929

 


===== Падобныя старонкі =====
  * [[творы/васіль-вітка/васіль-вітка-трывога-ў-ельнічах]]
  * [[творы/васіль-вітка/васіль-вітка-слова]]
  * [[постаці/васіль-вітка]]
  * [[творы/васіль-вітка/васіль-вітка-генерал-верабей]]
  * [[творы/васіль-вітка/васіль-вітка-ружа-і-штык]]