~~META:
title = Васіль Вітка — Верасы
&keywords = верасы
&abstract = Верш Васіля Віткі "Верасы"
&iftrue = nan
~~

====== Васіль Вітка — Верасы ======
Што гэта: казка ці сон,\\
Ці лесу галасы?\\
Смычкоў суладны унісон\\
З размаху, наўскасы\\
\\
Ударыў – і вясёлы дождж\\
За хмаркаю услед\\
Пабег, як хлопчык, басанож\\
У ясны, мілы свет,\\
Не разбіраючы дарог,\\
Да пушчы, нацянькі,\\
Дзе прабіваюць тоўсты мох\\
Грыбы баравікі,\\
\\
Дзе сонца пырскае з суніц\\
І сонныя чмялі\\
За дзень ад паху медуніц,\\
Зусім абнемаглі,\\
\\
Дзе ў пацерках густой расы,\\
Між цёплых баравін,\\
Нам песню дораць верасы\\
На дарагі ўспамін.

 


===== Падобныя старонкі =====
  * [[творы/максім-гарэцкі/максім-гарэцкі-у-панскім-лесе]]
  * [[ibdc.ped>у-лесе]]
  * [[творы/якуб-колас/казкі-жыцця/якуб-колас-стары-лес]]
  * [[творы/рыгор-ігнаценка/рыгор-ігнаценка-вартавы-цішыні]]
  * [[творы/рыгор-ігнаценка/рыгор-ігнаценка-сон-у-лесе]]