~~META:
title = Артур Вольскі — Чарнічка
&keywords = чарнічкі, лісточак, справа, злева, сонца, грабе, зялёны
&abstract = Чытаць верш Артура Вольскага "Чарнічка"
&iftrue = nan
~~

====== Артур Вольскі — Чарнічка ======
У засені сосен,\\
дзе мох ды іглічка,\\
расла-даспявала\\
красунька-чарнічка.\\
\\
Калі на світанку\\
не бачыла хмарак,\\
расой абмывала\\
свой кругленькі тварык.\\
\\
А потым

на сонейку

плечыкі грэла.\\
Нібы негранятка,\\
яна загарэла.\\
\\
Быў сябра ў чарнічкі –\\
зялёны лісточак,\\
схаваў ён яе\\
ад вавёрчыных вочак.\\
\\
Складала вавёрка\\
грыбы на палічкі,\\
але не прынесла\\
чарняўкі-чарнічкі.\\
\\
I вожык праходзіў\\
сцяжынкаю блізкай.\\
Павёў у паветры\\
кірпатаю пыскай.\\
\\
Але і яму,\\
не мяняючы звычкі,\\
лісток не дазволіў\\
пакрыўдзіць чарнічкі.\\
\\
Шукала спажывы\\
мядзведзіца ўранку.\\
I вось на чарнічную\\
выйшла палянку.\\
\\
Расселася, тлустая,\\
як сярод хаты.\\
I сонца схавала\\
спіною кашлатай.\\
\\
Грабе сабе злева,\\
грабе сабе справа.\\
I злева і справа –\\
мядзведжая страва.\\
\\
Няўжо для чарнічкі –\\
апошні дзянёчак?\\
Ды не пахіснуўся\\
зялёны лісточак!\\
\\
На ўвесь свой расточак\\
устаў абаронца...\\
I вось ужо зноў\\
паказалася сонца.\\
\\
Ах, што за лісточак!\\
Такі невялічкі –\\
мядзведзіцы нават\\
не выдаў чарнічкі!

 


===== Падобныя старонкі =====
  * [[творы/артур-вольскі/артур-вольскі-вожык-дзівачок]]
  * [[постаці/віталь-вольскі]]
  * [[творы/артур-вольскі/артур-вольскі-пагоня]]
  * [[творы/віталь-вольскі/віталь-вольскі-несцерка]]
  * [[постаці/артур-вольскі]]