~~META:
title = Артур Вольскі — Сталяры
&keywords = лаўка, сядзем, тук-так-ток, ната, слаўкам, сталяры, лаўку
&abstract = Чытаць верш Артура Вольскага "Сталяры"
&iftrue = nan
~~

====== Артур Вольскі — Сталяры ======
Мы са Слаўкам –\\
сталяры:\\
робім лаўку\\
на двары.\\
\\
Жоўтыя апілкі\\
сыплюцца\\
з-пад пілкі.\\
Стружкі\\
з-пад рубанкаў –\\
вязкай абаранкаў.\\
\\
Мы для лаўкі\\
дошкі\\
падгаблюем трошкі.\\
Вось гатова спінка.\\
Вось гатовы ножкі.\\
\\
Тук-так-ток,\\
тук-так-ток, –\\
заспяваў малаток.\\
Ды чамусьці\\
цвікі\\
загінаюцца\\
ў бакі.\\
Выпраміш –\\
і зноўку\\
хіліць цвік галоўку.\\
Аж да стомы\\
працавалі,\\
але лаўку\\
змайстравалі.\\
\\
Мы абодва\\
рады надта,\\
ды прыйшла сястрычка\\
Ната.\\
Паглядзела\\
і сказала:\\
– З вашай працы\\
толку мала.\\
Нават боязна садзіцца.\\
Можа лаўка\\
разваліцца…\\
\\
Я ў адказ:\\
– Наадварот!\\
Прастаіць яна сто год…\\
\\
Ната зноў:\\
– Ну што ж,\\
паглядзім…\\
Я – да Слаўкі:\\
– Сядзем?\\
– Сядзем!\\
\\
Я саджуся.\\
Сеў і Слаўка…\\
Нас дваіх\\
Трымае лаўка.\\
\\
– Во, – кажу я\\
да сястры, –\\
мы са Слаўкам –\\
сталяры!

 


===== Падобныя старонкі =====
  * [[творы/авяр-ян-дзеружынскі/авяр-ян-дзеружынскі-той-хто-працуе]]
  * [[творы/васіль-зуёнак/васіль-зуёнак-пакуль-у-неба-б-юць-пад-ём]]
  * [[творы/авяр-ян-дзеружынскі/авяр-ян-дзеружынскі-адкуль-з-явіліся-рам]]
  * [[ibdc.ped>на-заводзе]]
  * [[ibdc.ped>праца-тваіх-рук]]