~~META:
title = Артур Вольскі — Мой скарб
&keywords = скарб, багацце
&abstract = Чытаць верш Артура Вольскага "Мой скарб"
&iftrue = nan
~~

====== Артур Вольскі — Мой скарб ======
Як і кожны ў маёй старане,\\
я багацце нязмернае маю.\\
Ды не ў грошах, не ў золаце – не!\\
У любові да роднага краю.\\
\\
Гэты скарб не схаваны ў зямлі,\\
не закуты ў іржавай скарбонцы.\\
Ён вясною з адталай раллі\\
узнімаецца рунню да сонца.\\
\\
Не кладзецца ў далярах на стол\\
і працэнтаў мой скарб не прыносіць.\\
Ён пладамі даспелымі ў дол,\\
рэха будзячы, бумкае ўвосень.\\
\\
Скарб той крыецца ў кожным кутку\\
неабсяжнай маёй Беларусі.\\
Рады я дружбаку, земляку,\\
з ім пароўну багаццем дзялюся.\\
\\
Беларусь!\\
Узараную,\\
дымную,\\
у лістоце бяроз і дубоў –\\
абдымаю цябе,\\
неабдымную,\\
ты – багацце маё і любоў.

 


===== Падобныя старонкі =====
  * [[творы/ян-баршчэўскі/паданне-ад-севярына-пра-зямныя-скарбы]]
  * [[ibdc.ped>скарбы-продкаў]]
  * [[творы/уладзімір-караткевіч/уладзімір-караткевіч-чортаў-скарб]]
  * [[ibdc.ped>скарбы-нашай-радзімы]]
  * [[творы/змітрок-бядуля/змітрок-бядуля-скарб]]