~~META:
title = Артур Вольскі — Калядкі
&keywords = ладачкі-ладкі, хочаш, ешце, галубкі, калядкі
&abstract = Чытаць верш Артура Вольскага "Калядкі"
&iftrue = nan
~~

====== Артур Вольскі — Калядкі ======
Ой, ладачкі-ладкі,\\
Надышлі Калядкі.\\
Мы дзеля Калядак\\
напяклі аладак.\\
\\
Дралі дробнай таркаю\\
дранікі духмяныя.\\
Хочаш – еш са скваркаю,\\
хочаш – са смятанаю.\\
Вось вам, калі ласка,\\
з жэрдачкі каўбаска.\\
Вось кавалак пірага,\\
каб не брала вас туга.\\
\\
Ой, ладачкі-ладкі!\\
І мядок салодкі\\
да лясной гарбаткі\\
наліем у сподкі.\\
І запахне рутай,\\
верасам, чаборам,\\
каб зімою лютай\\
нам не знацца з горам.\\
\\
Бярыце з талеркі\\
лізунцы, цукеркі!\\
\\
Ешце ўволю, ешце,\\
Ды не псуйце зубкі…\\
Песняй нас пацешце,\\
галубкі, галубкі!\\
\\
Бохан – поўняй яснаю,\\
яйкі, бульба, скваркі.\\
Гэта ўсё – з уласнае\\
нашай гаспадаркі.\\
\\
Калі вам прысмакі\\
прыйдуцца да смаку,\\
прынясіце Богу\\
шчыпую падзяку.\\
\\
Ой, ладачкі-ладкі –\\
Пляскаем у ладкі!\\
Ой, ладачкі-ладкі –\\
Святкуем Калядкі!

 


===== Падобныя старонкі =====
  * [[творы/васіль-жуковіч/васіль-жуковіч-калядная-вячэра]]
  * [[творы/мікола-чарняўскі/мікола-чарняўскі-ліса-калядоўшчыца]]
  * [[слоўнік/калядка]]
  * [[ibdc.ped>батлейка-калядны-лялечны-тэатр]]
  * [[ibdc.ped>каляды]]