~~META:
title = Артур Вольскі — Буслава шапка
&keywords = жабка, бусел, шапка, пінжаку, баку, хусткай, белай, парадных, ботах, чырвоных, балот, ходзіць, лапку
&abstract = Чытаць верш Артура Вольскага "Буслава шапка"
&iftrue = nan
~~

====== Артур Вольскі — Буслава шапка ======
Схапіў бусел жабку\\
За левую лапку,\\
А пасля – за правую,\\
Грозіць ёй расправаю.\\
\\
Просіць жабка: – Не карай!\\
Слоўца вымавіць мне дай.\\
Ты блукаеш па балотах\\
У сваіх чырвоных ботах,\\
\\
У парадным пінжаку,\\
З белай хусткай на баку.\\
Ды ў цябе, браток, ква-ква –\\
Не пакрыта галава.\\
\\
Не рабі мне, бусел, ліха.\\
Я вядомая краўчыха.\\
Вазьму голку ў лапку\\
І пашыю шапку\\
\\
З лісточкаў лілейных,\\
Самых надзейных.\\
А, каб кожны бачыў,\\
Прышпілю гарлачык.\\
\\
Кажа бусел: – Праўда, жабка,\\
Вельмі мне патрэбна шапка!\\
Мяне сонца пячэ,\\
Мяне дожджык сячэ...\\
\\
Тыдзень, два, а, можа, тры\\
Прамінула з той пары.\\
Ходзіць бусел па балотах\\
У сваіх чырвоных ботах,\\
\\
У парадным пінжаку,\\
З белай хусткай на баку.\\
Ходзіць злосны – сам не свой,\\
З непакрытай галавой:\\
\\
– Адгукніся, жабка,\\
Ці гатова шапка?!

 


===== Падобныя старонкі =====
  * [[творы/артур-вольскі/артур-вольскі-пагоня]]
  * [[ibdc.ped>шчасце]]
  * [[творы/віталь-вольскі/віталь-вольскі-несцерка]]
  * [[постаці/віталь-вольскі]]
  * [[постаці/артур-вольскі]]