~~META:
title = Аркадзь Куляшоў — Элегія
&keywords = гады
&abstract = Чытаць "Элегію" Аркадзь Куляшова
&iftrue = nan
~~

====== Аркадзь Куляшоў — Элегія ======
Жыццё маё – цяжкі з гадамі бой,\\
І чым далей, то ўсё даўжэй прывалы,\\
Буксуюць вершы, быццам самазвалы,\\
Ды знаю я: надыдзе момант той,\\
\\
Калі не хвоі снамі баравымі\\
Атуляць мой дарожны неспакой,\\
А схіляцца зларадна нада мной\\
Мае гады з бародамі даўгімі.\\
\\
Чаго прыйшлі, за цудамі якімі?\\
Якога мне яны жадаюць сну?\\
Яшчэ я ўстану, падапруся кіем,\\
Старэчыя бароды расхіну.\\
\\
За ўсе гады вазьму з гадоў даніну,\\
З дарогай разлічуся рэштай дзён,\\
Астатнія, як костку, смерці кіну\\
За той парог, дзе векавечны сон.\\
\\
1961

 


===== Падобныя старонкі =====
  * [[творы/пімен-панчанка/пімен-панчанка-прысніўся-сон]]
  * [[творы/рыгор-крушына/рыгор-крушына-элегія]]
  * [[творы/максім-багдановіч/не-кувай-ты-шэрая-зязюля]]
  * [[творы/максім-танк/максім-танк-ой-не-гніце-ветры]]
  * [[слоўнік/элегія]]