~~META:
title = Аркадзь Куляшоў — Пра восень
&keywords = вясны, восень, свечкі, праводзінах, памінках, лес, дол
&abstract = Верш Аркадзя Куляшова "Пра восень"
&iftrue = nan
~~

====== Аркадзь Куляшоў — Пра восень ======
Замаўкаюць птушыныя звонкія спевы,\\
Калі восень прыходзіць у край наш лясны,\\
І, як свечкі, вакол ярка ўспыхваюць дрэвы\\
На праводзінах лета, на памінках вясны.\\
\\
Там, дзе восень ідзе, лес шумлівы радзее,\\
Вецер гоніць хмарыны з-за цёмных ялін,\\
Грозны чуючы сівер, лісты, як надзеі,\\
Аблятаюць на дол з пачарнелых галін.\\
\\
Я, улюбёны ў жыццё, не скаруся пагрозе\\
На праводзінах тых, на памінках старых,\\
Выйду з лесу і стану ў зімы на парозе\\
Дрэвам я, што лістоў не губляе сваіх.\\
\\
Я трымаў іх з вясны, да вясны датрымаю,\\
Не развею па свеце, не кіну ў бяду,\\
Дружным пошумам іх новы май прывітаю\\
І з адзінаю просьбай на дол упаду:\\
\\
– Адгукніся, вясна, мне зязюляй з-за рэчкі,\\
Дай яшчэ раз прыпасці да любай зямлі\\
І каштанаў сваіх незгасальныя свечкі\\
Над маёй адшумеўшай вясной запалі!

 


===== Падобныя старонкі =====
  * [[творы/аркадзь-куляшоў/аркадзь-куляшоў-балада-аб-чатырох-заложн]]
  * [[творы/аркадзь-куляшоў/аркадзь-куляшоў-xамуціус]]
  * [[постаці/аркадзь-куляшоў]]
  * [[творы/аркадзь-куляшоў/аркадзь-куляшоў-варшаўскі-шлях]]
  * [[творы/аркадзь-куляшоў/паэзія-аркадзя-куляшова-яе-тэматыка-грам]]