~~META:
title = Аркадзь Куляшоў — Плыла, цалавалася хмара з зямлёй...
&keywords = хмара, хацела, глядзіць, плошчу
&abstract = Чытаць верш Аркадзя Куляшова "Плыла, цалавалася хмара з зямлёй..."
&iftrue = nan
~~

====== Аркадзь Куляшоў — Плыла, цалавалася хмара з зямлёй... ======
Плыла, цалавалася хмара з зямлёй,\\
Аж жнеі сярпы пакідалі,\\
Бо ўгледзелі ўжо, як збягаюць па ёй\\
Маланкі\\
На жытнія далі.\\
\\
Таму, што нясе яна мёд для пчалы\\
І робіць дарогу лягчэйшай,\\
Ўсе рэкі прыцягваць яе пачалі,\\
І хмара плыве да шырэйшай.\\
\\
Сябе яна хоча ў тым люстры пазнаць,\\
Прыціхла,\\
На цыпачкі стала,\\
Глядзіць з вышыні ў пацямнеўшую гладзь,\\
Глядзіць,\\
Толькі плошчы ёй мала.\\
\\
Зноў хмара злуецца, зноў, мусіць, з тугі\\
Кідае свае бліскавіцы,\\
Рассунуць хацела б яна берагі,\\
Хацела б\\
Краямі ўмясціцца.\\
\\
І не ўпершыню з непакоем былым\\
Удаль адплывае без згадкі.\\
А следам за ёй,\\
Як за лёсам сваім,\\
Спяшаюцца воблакаў статкі.\\
\\
Глядзяцца – адбітыя ў завадзяў шкле –\\
З нябёс у люстраную плошчу,\\
Красу сваю бачаць, блакіт свой.\\
Але\\
Я воблакам тым не зайздрошчу.\\
\\
Хачу неспакойнаю хмарай грымець,\\
Маланкамі ўвесь апавіты,\\
Каб цяжка адразу было зразумець\\
Ці вокам акінуць, які ты.\\
\\
Спакою не ведаць ні ноччу, ні днём\\
І не прыставаць у знямозе,\\
Вялікай любові дажджом\\
І агнём\\
Зямлю цалаваць па дарозе.\\
\\
1940

 


===== Падобныя старонкі =====
  * [[постаці/аркадзь-куляшоў]]
  * [[творы/аркадзь-куляшоў/аркадзь-куляшоў-xамуціус]]
  * [[творы/аркадзь-куляшоў/паэзія-аркадзя-куляшова-яе-тэматыка-грам]]
  * [[творы/аркадзь-куляшоў/аркадзь-куляшоў-балада-аб-чатырох-заложн]]
  * [[творы/аркадзь-куляшоў/аркадзь-куляшоў-варшаўскі-шлях]]