~~META:
title = Аркадзь Куляшоў — Мая Бесядзь
&keywords = каня, кропляй
&abstract = Верш Аркадзя Куляшова "Мая Бесядзь"
&iftrue = nan
~~

====== Аркадзь Куляшоў — Мая Бесядзь ======
Кажуць, што рэкі птушкамі створаны, –\\
Такімі малымі на першы пагляд, –\\
Капалі і ў дзюбах адносілі ў бор яны\\
Мяшочкі з зямлёй\\
І ляцелі назад.\\
А каня гуляла ды мыла іх здзекамі,\\
І птушкі паслалі ёй вечны праклён,\\
Таму і лятае яна над рэкамі\\
І просіць піць\\
Аж да сённяшніх дзён.\\
Канаючы ўлетку штодня на спякоце,\\
Той рэдкаю кропляй яна існуе,\\
Што хмарка, дажджом прашумеўшы ў лістоце,\\
З нябёсаў часамі пашле для яе.\\
Я ўпарты, не кіну пачатае справы,\\
Каменне крышу,\\
Разграбаю пяскі,\\
Пад кпіны аматараў лёгкае славы\\
Капаю рэчышча ўласнай ракі.\\
З надзеяй гляджу на крыніцу спатканую,\\
Хачу, каб яна разлілася ракой...\\
Не Волгай магутнай,\\
Не нават Камаю,\\
Хоць Бесяддзю, што на радзіме маёй.\\
Бо прагай да працы ахоплены часта я,\\
І сэрца абпалена смагай радка,\\
Бо жыць не магу,\\
Як каня няшчасная,\\
Кропляй дажджу з лесавога лістка.\\
\\
1940-1946

 


===== Падобныя старонкі =====
  * [[творы/аркадзь-куляшоў/аркадзь-куляшоў-балада-аб-чатырох-заложн]]
  * [[творы/аркадзь-куляшоў/аркадзь-куляшоў-варшаўскі-шлях]]
  * [[постаці/аркадзь-куляшоў]]
  * [[творы/аркадзь-куляшоў/аркадзь-куляшоў-xамуціус]]
  * [[творы/аркадзь-куляшоў/паэзія-аркадзя-куляшова-яе-тэматыка-грам]]