~~META:
title = Анатоль Грачанікаў — Шарпілаўка цячэ ў жыццё, як Сож...
&keywords = трэба, жыццё
&abstract = Чытаць верш Анатоля Грачанікава "Шарпілаўка цячэ ў жыццё, як Сож..."
&iftrue = nan
~~

====== Анатоль Грачанікаў — Шарпілаўка цячэ ў жыццё, як Сож... ======
Шарпілаўка цячэ ў жыццё, як Сож,\\
Свае ў яе віры і перакаты.\\
Апоўначы на сцішаныя хаты\\
Мядзведзіца схіляе зорны кош.\\
I ў першароднай цішыні наўкол\\
Я слухаю, прысеўшы на калоды,\\
Як вечнасць, асядаючы на дол,\\
Быцця зямнога запаўняе соты.\\
Гудуць у небе зоры, быццам восы,\\
Нябесная дыміцца сенажаць.\\
Нібы застагаваныя пакосы,\\
Над лесам хмары сонныя ляжаць.\\
А вёска спіць. Бязгрэшна. Ціхамірна.\\
Ад бальшакоў задымленых узбоч.\\
На ўсё жыццё запрэжаная ў свірны,\\
Перапаўзае жнівеньскую ноч.\\
Сапе смактухай успацелай глеба.\\
З дасвеццем праясняецца смуга.\\
Не трэба вёсцы дакучаць, не трэба.\\
Яна сама разбудзіць пастуха.\\
\\
1967\\
\\


Крыніца: Грачанікаў А. Верасень: Вершы. – Мн.: Маст. літ., 1984. – 142 с.

 


===== Падобныя старонкі =====
  * [[ibdc.ped>нёман]]
  * [[творы/сяргей-грахоўскі/сяргей-грахоўскі-пачатак]]
  * [[творы/ніна-мацяш/ніна-мацяш-жыла-была-рака]]
  * [[творы/эдзі-агняцвет/эдзі-агняцвет-рэчка-рэчанька-мая]]
  * [[творы/якуб-колас/якуб-колас-каля-рэчкі]]