~~META:
title = Анатоль Грачанікаў — На Палессі...
&keywords = курганы, дзень, звон, палессі, палессе, звіняць, сівыя, званы, плыве
&abstract = Чытаць верш Анатоля Грачанікава "На Палессі..."
&iftrue = nan
~~

====== Анатоль Грачанікаў — На Палессі... ======
На Палессі – спрадвеку, як быццам званы,\\
Несціхана сівыя звіняць курганы.\\
\\
То трывожна набатны, то як ранішні сон,\\
Над зямлёю плыве іх малінавы звон.\\
\\
На Палессі маім – курганоў як грыбоў.\\
Мала ў вёсках унукаў і мала дзядоў.\\
\\
I над намі з маленства, як быццам званы,\\
Задуменна сівыя звіняць курганы.\\
\\
Калыханку спрадвечную чую ўначы:\\
«Волю цяжка здабыць, ды цяжэй зберагчы.\\
\\
Я, Палессе, не стану ніколі батрачкай.\\
Калі сон ваш не стане глыбокаю спячкай...»\\
\\
Урачыста плыве ў журавіннае ранне:\\
«Добры дзень вам, нашчадкі!\\
Добры дзень вам, зямляне!\\
\\
Хай жа будзе для вас гэты дзень умалотны,\\
А для вашага сэрца – апошні журботны!..»\\
\\
Пойдзе дзень на спачын – звон паціху

ачахне.

Як жывіцай, внчэрай Палессе пранахне.\\
\\
I нядрэмна глядзяць нам у вочы яны –\\
Курганы, курганы, курганы...\\
\\
1968\\


\\
Крыніца: Грачанікаў А. Верасень: Вершы. – Мн.: Маст. літ., 1984. – 142 с.

 


===== Падобныя старонкі =====
  * [[ibdc.ped>палесся-абрус-аксамітны]]
  * [[ibdc.ped>прыпяцкі-запаведнік]]
  * [[ibdc.ped>сцяжынкамі-янішчыц]]
  * [[творы/сяргей-грахоўскі/сяргей-грахоўскі-гарывада]]
  * [[творы/анатоль-бутэвіч/анатоль-бутэвіч-мора-герадота]]