~~META:
title = Анатоль Грачанікаў — Гусак і Певень
&keywords = Певень, куды, Гусак, бачылі
&abstract = Чытаць верш Анатоля Грачанікава "Гусак і Певень"
&iftrue = nan
~~

====== Анатоль Грачанікаў — Гусак і Певень ======
Певень аднойчы\\
Сказаў Гусаку:\\
– Пойдзем, мой дружа,\\
З табой на раку!\\
Ты – пехатою,\\
А я – палячу.\\
Плаваць і я\\
Навучыцца хачу.\\
\\
– Гэта выдатна, –\\
Прамовіў Гусак, –\\
Але калі ты\\
Надзейны дружбак,\\
На крылах да рэчкі\\
Мяне данясі,\\
А там ужо\\
Добра мяне папрасі...\\
\\
Узняліся у неба\\
Высока сябры.\\
Войкаюць\\
Куры і гусі ў двары:\\
– Куды вы?\\
– Куды вы?\\
– Куды вы?\\
– Куды?\\
О-го-го-го!\\
Не мінуць вам\\
Бяды!\\
\\
Бачылі вы,\\
Хоць бы раз,\\
Альбо не:\\
Гайдаецца ў Пеўня\\
Гусак на спіне.\\
Аслупянелі усе.\\
Нават і дзед,\\
Разявіўшы рот,\\
Пазірае\\
Услед.

\\
Крыламі Певень\\
Штосілы махае,\\
Ды і Гусак той\\
Яму памагае.\\
Разам яны\\
Так да рэчкі дапялі.\\
Разам і ўпалі\\
Ў халодныя хвалі.\\
Певень храбрыцца,\\
Але ўсё адно\\
Вір яго цягне\\
На цёмнае дно.\\
Зубы драпежна\\
Ашчэрыў Шчупак...\\
Сябра ў бядзе\\
Не пакінуў Гусак.\\
\\
Бачылі вы,\\
Хоць бы раз,\\
Альбо не:\\
Певень плыве\\
Ў Гусака на спіне.\\
Гусі і куры\\
На беразе скачуць:\\
– Не, малайцоў такіх\\
Не перайначыць,\\
Не, не загінуць\\
Яны анідзе,\\
Бо дружбакамі яны\\
I ў бядзе!

 


===== Падобныя старонкі =====
  * [[творы/якуб-колас/якуб-колас-храбры-певень]]
  * [[творы/вацлаў-ластоўскі/вацлаў-ластоўскі-пад-старасць-адгукнецца]]
  * [[творы/ларыса-геніюш/ларыса-геніюш-певень]]
  * [[творы/эдуард-валасевіч/эдуард-валасевіч-сонца-і-певень]]
  * [[творы/кандрат-крапіва/кандрат-крапіва-кукарэку]]