~~META:
title = Анатоль Грачанікаў — Апошні круг
&keywords = танец, скачуць, важак, развітальны, чарадзе
&abstract = Чытаць верш Анатоля Грачанікава "Апошні круг"
&iftrue = nan
~~

====== Анатоль Грачанікаў — Апошні круг ======
//I. П. Мележу//

\\
Цяжка чарадзе без важакоў...\\
На Палессі\\
Пасярод балота\\
Развітальны танец\\
Журавоў\\
У вячэрні час\\
Перад адлётам.\\
\\
Зор далёкіх\\
Чуючы харал,\\
Скачуць птушкі\\
Пад напеў ласкавы.\\
Не трывожаць\\
Гэты рытуал\\
Ні звяры самотныя,\\
Ні травы.\\
\\
Зводдаль\\
Знерухомелы важак,\\
Прыгадаўшы,\\
Дзе ж сябры былыя,\\
Дзюбу ўскінуў.\\
Назірае, як\\
Скачуць ваяўніча\\
Маладыя.\\
\\
Хай паскачуць\\
Сярод спелых траў.\\
Месца хопіць\\
Кожнаму на ўзлессі.\\
Хай спазнаюць,\\
Што і ён спазнаў\\
У халодных высях\\
Паднябесся.\\
\\
Гэта не вясельны\\
Весні хмель,\\
Гэта развітальны\\
Танец горкі...\\
Жураўлісе\\
Чысціць журавель\\
Зорамі абвеяныя\\
Пёркі.\\
\\
Ён яшчэ\\
Узніме ўвысь\\
Касяк.\\
Покліч кіне\\
На лугі і пожні.\\
I не скажа чарадзе\\
Важак,\\
Што ў жыцці ён робіць\\
Круг апошні...\\
\\
1980

\\
\\
Крыніца: Грачанікаў А. Верасень: Вершы. – Мн.: Маст. літ., 1984. – 142 с.

 


===== Падобныя старонкі =====
  * [[творы/янка-брыль/увесь-свет-адзін-дом-па-раману-янкі-брыл]]
  * [[творы/янка-брыль/птушкі-i-гнёзды-сцюдзёны-вырай-аповесць-]]
  * [[творы/янка-брыль/раман-янкі-брыля-птушкі-і-гнёзды-вобраз-]]
  * [[ibdc.ped>птушкі-шчасця]]
  * [[творы/янка-брыль/птушкі-i-гнёзды-гнёзды-за-дымам-аповесць]]