~~META:
title = Анатоль Вярцінскі — Тры цішыні
&keywords = цішыня
&abstract = Чытаць верш Анатоля Вярцінскага "Тры цішыні"
&iftrue = nan
~~

====== Анатоль Вярцінскі — Тры цішыні ======
Аднекуль з касмічнай вышыні\\
зыходзяць да нас тры цішыні.\\
Першая — вечаровая.\\
Тая, што, як маг,\\
ахутвае, зачароўвае —\\
лёгкі ў мага ўзмах.\\
Тая, што на вейкі\\
i вусны кладзе пячаць:\\
"Хопіць з вас,\\
чалавекі,\\
хопіць дбаць!\\
Спаць спаць!\\
Спяць куты і нішы,\\
спяць каты і мышы,\\
дзеці і птушкі спяць.\\
Людзі, цішай, цішай!\\
Люлі, хопіць дбаць!\\
Спаць, спаць!\\
Чые там крокі скрыпяць!\\
Спаць, спаць!"\\
Ёсць цішыня-паўночніца,\\
начная цішыня.\\
Дум бяссонных памочніца,\\
вярхоўны іх старшыня.\\
Застацца з той цішынёю,\\
з ёю, сівой савой,—\\
стаць сутнасцю сваёю,\\
стаць самім сабой.\\
Застацца з ёю — гэта\\
у той увайсці сезам,\\
дзе сам-насам з сусветам,\\
з вечнасцю сам-насам.\\
І ёсць цішыня світальная,\\
ёсць яшчэ цішыня,\\
першага вітання,\\
першага агня.\\
Яна заводзіць гадзіннікі,\\
і разам з імі яна\\
пазвоньвае-падзіньквае,\\
і — трубіць цішыня.\\
Трубіць ціша світальная\\
у свой сярэбраны рог,\\
заве ў далі дальнія,\\
да новых спраў i дарог.\\
Трубіць ціша світальная,\\
крыштальная, развітальная,\\
i патанае яна\\
у вадаспадзе дня.

 


===== Падобныя старонкі =====
  * [[творы/казімір-камейша/казімір-камейша-цішыня]]
  * [[творы/анатоль-вярцінскі/анатоль-вярцінскі-цётка-плакала-па-ўсім-]]
  * [[ibdc.ped>цішыня]]
  * [[творы/анатоль-вярцінскі/анатоль-вярцінскі-рэквіем-па-кожным-чацв]]
  * [[ibdc.ped>чароўная-асенняя-пара]]